البرامج التلفزيونية او البرايم تايم في العالم العربي تختلف من حيث الشكل والنوع والتطبيق عن اي برنامج تاني, يعني احنا اللي بالصلاة على النبي بهدلنا تلفزيون الواقع وزعلنا برامج المسابقات وحطينا على التوك شو السياسي.
تعرف معي عزيزي القاريء على خمس برامج تلفزيونية مختلفة من حيث الاحاسيس المريبة التي تثيرها بداخلك
١. برنامج الحكم
هو احساس واحد الصراحة, هو انتي شامة ريحة وحشة من الضيوف؟ طيب لو مش شامة ريحة وحشة, انتي قرفانة منهم ليه؟ ولو مش قرفانة منهم بس بتتكلمي انت وبتقاطعيهم , طب بتستضيفيهم ليه؟ وبعدين اسئلتك مستفزة ليه؟ وانت شخصيا بتتكلمي كده ليه؟ هو احنا زعلناكي في حاجة طيب؟ يعني انا كمشاهدة ليه احس اني بنت ستين *** عشان قلبت على الحلقة ؟ طيب انا اسفة والله, اهو!
٢. الراقصة
سيبك من الاضاءة المريبة والقطيفة الحمراء والضلمة المحيطة بتلافيف قلبك من جوه, وسيبك من الراقصات الاي كلام وفكرة البرنامج والمذيعين اللي ملهمش اي حضور والسيناريست اللي ملوش علاقة بالرقص غير انه عضو لجنة التحكيم وسيبك من الاستاذة دينا ثبت الله خطاها في مهمتها التاريخية وسيبك من حرص القناة على حشر تاريخ الراقصات القديمات وسط كل حلقة قال يعني برنامج تاريخي ثقافي جاد (معرفتكش انا كده)وبرضه سيبك من الفنانة اللى على يمين دينا في لجنة التحكيم اللي محدش عارفها اساسا. انا سؤالي هو ليه كل اللي شافوا البرنامج بيجليهم الاحساس ان بوكس مباحث الاداب هيرجع بضهره ونركبه كلنا وده مع كل حلقة ؟ برنامج الراقصة بيشعرك انك بتعمل حاجة غلط وبتكون محرج من الفرجة عليه لدرجة انك مش هتقول لأصحابك انك بتشوفه (مش زي البورن يعني), البرنامج مرهق للمشاعر لدرجة تخوفك من التقليب ناحية القناة في وقت عرضه لا البوليس يكبس!
٣. اراب ايدول
يعني حسن الشافعي بتسريحة شعره المريبة, يعني كل المطربين بيغنوا بعيد عن الفرقة تماما وبرضه يقولولهم “احسنت”, يعني يخرب بيت طعامة نانسي عجرم اللي غالبا بتفطر بسبوسة بالفراولة وبتجبرك على الصراخ “يا دين النبي” كل ما تظهر على الشاشة, يعني راغب علامة بخفة دمه سابقا ووائل كافوري اللي محدش لاقيله لازمة حاليا, يعني أحلام. أحلام, الي بتعيد صياغة فيلم الجميلة والوحش كل اسبوع بقعدتها جنب نانسي, يعني بصمتها المريب قبل اي تعليق, يعني تعمدها الغريب السيطرة على مجريات البرنامج, يعني لازم تقف تحيي كل مطرب عشان تورينا الفستان او البيجامة اللي هي لابساهم, يعني مانيكير اخضر وتسريحة عش الدبابير وكل الوان الايشادو في عينيها, يعني “عفقة” و”عٌرب” وكلام غريب لازم يتقال في كل لحظة, يعني اقلب القناة اول ما المطرب يخلص عشان احلام هتتكلم, يعني الاحساس بمزيج من حرقة الدم مع الرغبة في قطع شرايين الايد.
٤. ستار اكاديمي
رغم اني عمري ما تابعته لكن الظروف دفعتني اني احاول اتعرف عليه (عشان كنت عيانة وراقدة وزهقانة: متظلمنيش ارجوك), انا حقيقي مش فاهمة ليه اتابعهم وهما صاحيين من النوم بعماصهم وبعدين اتفرج علي كل مراحل حياتهم اليومية (شفاكم الله وعفاكم وكده) وصولا الى “البرايم” اللي هو مليان اصوات وحشة وعروض راقصة غريبة واستفزاز في لبس المذيعة (رغم انها مزة والله اعلم), يعني من الاخر, ليه بكون قادرة اسمع معدل ذكائي وهو بينخفض جوه دماغي وانا باتفرج على ستار اكاديمي؟
٥. برامج المقالب (كلها)
بداية من عمك رامز جلال وصولا الى اي 3 اصحاب لقوا منتج لسه صاحي من النوم ومش مركز وخلوه ينتج لهم برنامج مقالب مستفز, انا بقالي 12 سنة ملقيتش برنامج مقالب مصري مضحك, كل اللي لقيته برامج مهينة للضيوف, مستفزة للمشاعر وسيئة الانتاج والتنفيذ. البرامج دي تصنيفها عندي من حيث الاحساس هو احساس ” انا عايزة اكسر التلفزيون بس لازم امسك نفسي والا بابا هيطردني من البيت وانا بحب بيتنا وبحب ابويا الصراحة” يتبعه احساس “حسبي الله ونعم الوكيل” واخيرا” يجيلك ويحط عليك يا بعيد”.
