لكل مجتمع اساطيره، خرافاته و شخصياته الخيالية الي بتميزه عن باقي المجتمعات .. و عشان المصريين احفاد الفراعنة و حضارة 7000 سنة، اخترعوا حاجات عجيبة و غريبة بتميزنا عن المجتمع الغربي، مع اختلاف الروايات من اسرة للتانية لان كل اب و ام بيحبوا يضيفوا التاتش بتاعتهم! دول اكتر 6 افتكاسات كل عيلة مصرية اشتغلت بيها اطفالهم:
١. يا شمس يا شموسة
و احنا صغيرين في مرحلة تبديل الاسنان اللبنية، كان بابا و ماما يقولك ايه؟ خودها ارميها من الشباك و قول “يا شمس يا شموسة خودي سنة الجاموسة و هاتي سنة العروسة” و لو مقلتش كده مش هتطلعلك اسنان جديدة!! بغض النظر عن كمية اللا منطق في الموضوع و تأثيرة بشكل مباشر او غير مباشر على الصحة العقلية للطفل المصري .. مكنش فيه تشبيه احسن شوية من “سنة الجاموسة”؟؟
٢. ابو شوال
الشخصية الي كل اب و ام خاوفوا بيها اطفالهم لو ماناموش بليل، ابو شوال هيجي يخطفهم و يحطهم في الشوال بتاعه مع العيال الوحشين الي ماناموش. لو الطفل رخم هيعاند و يفضل صاحي عشان يشوف ابو شوال.
٣. ابو رجل مسلوخة
الكائن الاسطوري الي هيخطف الاطفال الصغيرة الوحشة الي مبتسمعش الكلام. بغض النظر ان بيبقى فيه فعلاً اطفال لا تتطاق بس مش لدرجة اني اعرفه مصطلح “مسلوخة” و هو مكملش 3 سنين
٤. اوضة الفئران
“لو مبتطلتش زن هنوديك اوضة الفئران” و لحد دلوقتي محدش يعرف فين اوضة الفئران و بعدين اشمعنى الفئران؟ ليه مش صراصير مثلاً متهيألي كانت هتبقى مخيفة اكتر
٥. امنا الغولة
كائن خرافي انثوي اخترعه المصريين عشان المساواة و كده. مينفعش يعني تبقى كل الكائنات الاسطورية المرعبة ذكور! امنا الغولة ديه المفروض انها مرعبة اكتر من اي حد و بتخطف الاطفال الوحشيين الي مبيسمعوش الكلام.
