انا جربت كل حاجة! اي وسيلة مواصلاتية على البر ركبتها من التوك توك للقطر، مريت بكمية مواقف غير لطيفة بالمرة لا تعد و لا تحصى، غير الظواهر العجيبة الي برصدها بشكل يومي. و استنتجت في النهاية ان مفيش في مصر وسيلة مواصلات واحدة في مصر مريحة! و طالما خرجت من دارك يبقى هيتقل من دارك.. دول اكتر ٩ ظواهر بتضايقني في المواصلات:
١. مرايات ايفري وير
تلاقي السواق مرشق المكان كله مرايات لدرجة تشعرك بالريبة، متعرفش هل هو مشغول بمراقبتك و لا بالسواقة. و يتراوح عدد المرايات المعلقة على الزجاج الامامي من 6 ل 18 مراية. تتواجد هذه المرايات بكثرة في التاكسيات، التوك توك و الميكروباصات.
٢. المهرجات
معنديش اي مشكلة تسمع شوية دوشة على كلمات ملهاش اي معني، و مش عايزة اعرف ازاي بني ادم طبيعي ممكن يستحمل يسمع الهري ده كتير. بس الي ميتسكتش عليه انك تركب 5000 سماعة و تنشر التلوث السمعي الي بتسمعه ده على خلق الله و نبقي كأننا ماشيين بمهرجان متنقل
٣. تعالي جنبي يا انسة
يتكرر هذا الموقف مع سائقي الميكروباص و احياناً الاتوبيس. حظي السئ لما اتزنق في يوم و اضطر اركب قدام. مابيعصبنيش اكتر من التعليقات الغبية الي بيقولها السواق على الي رايح و الي جاي و يعمل نفسه فيها احسن سواق فيكي يا مصر
٤. بلااا بلااا بلاااا
ده الي انا بسمعه من كل سواق يفتح نقاش في اي موضوع و ردي بيكون “اه.. ام.. معاك حق” مع ايماءة رأس بسيطة .. حقيقي انا مش مهتمة اعرف رأيك السياسي ايه، فطرت ايه انهارده او ابنك حماده ضرب مين في المدرسة و اترفد
٥. ملكش فيه
هو تقريباً نفس السواق الراغي! انا عارفة اني ابدو شخصية مثيرة للاهتمام بس انا فعلاً مش في المود اني اناقش تفاصيل من حياتي مع حضرتك. فسوق و انت ساكت
٦. انطلق يا مازنجر
لو طريقك دائري و حظك (الي مش عارفة هو حلو و لا وحش) و الطريق طلع نوعاً ما فاضي، هتلاقي نفسك طاير حرفياً من الكرسي الي المفروض انت قاعد عليه! لو سمحت حضرتك سايق ميكروباص مش مكوك فضائي!
٧. لسه فاضية ورا
سواقيين الميكروباص و التابعيين عنده اقتناع تام ان الاتوبيس يساع من الحبايب الف (بغض النظر انهم مش بيعاملونا معاملة حبايب خالص). السواق و التباع مش هيهدلهم لا بال و لا خاطر الا لما الركاب تبقى فوق بعض و نادراً لما بيحسوا بالساتسفكشن ده! هو دايماً مقتنع ان فيه لسه مكان فاضي ورا في الاتوبيس و لو مفيش هو هيحمل يعني هيحمل!
٨. الاجرة ٢ جنيه يا حضرات
– ليه يا اصطا انا لسه راكب بجنيه و نص؟
– البنزين غلي
يا اما الحوار هيخلص على كده يا اما ينتهي بخناقة! و غالباً بينتهي بخناقة.. و انا اخد بعضي و انزل من الميكروباص من سكات
٩. الساعة في ايدك كام
فيه 3 انواع من التوقييت: توقييت البشر العاديين، توقييت المصريين و توقييت سكك حديد مصر! سكك حديد مصر جامدين جداً و القطر هيتحرك وقت ما يجلهم مزاج انه يتحرك! عادي جداً تبقى حاجز قطر الساعة 4 يتحرك الساعة 6! عادي وراك ايه يعني الوزارة؟!
