الانترنت عالم جميل وشبكات التواصل الاجتماعي اختراع وكل حاجة وبتقربنا من بعض وكل الكلام اللطيف ده بس انا شخصية اميل للزهق بسرعة ومؤخرا بصة واحدة على التايملاين بتاع فيسبوك وصلتني لاستخلاص اكثر 11 جملة وستاتس ابديت هتقراها على فيسبوك في مصر.
١. كام لايك وكام شير
اصلي على النبي, ادعي للسيدة زينب, اعبر عن حبي للرئيس الحالي او السابق, ده موضوع بيني وبين نفسي. اي حاجة بتطلب فيها من الناس تعمل لايك وشير وخلاص رخص ملوش أي لازمة!
٢. الكيوتنس
صور الكلاب والقطط الكيوت والبنات الحلوة الكيوت والبيبي اللي بيرقص على رائعة بوسي “حط ايده يا”, معنديش حاجة اقولها الصراحة عشان انا صغيرة على الهم.
٣. حالة مشاعرك
كان يوم اسود برضه لما مارك زوكربرج اتهف في عقله وقرر يعمل Feeling ده, لو انت فيلنج لايك شيت او بتشوف اخر حلقة من ليالي الحلمية والنوستالجيا قاتلاك خلي المعلومات دي لنفسك والنبي.
٤. فقرة الاقوال المأثورة
ودي عامة حاجة من اثنين, يا ناس بتفهمنا انها عميقة وليها في الادب والفلسفة وكده يا إما ناس بتعبت رسائل لناس, يعني اكيد مش كلكوا صحيتوا تفكروا ان “الخيانة اقسى شيء على المرأة” أو انك صحيتي افتكرتي نزار قباني مثلا فجأة, لا يا ماما, صاحبك ماشي مع صاحبتك ام مناخير كبيرة وانتي بتنبطي.
٥. فقرة الاخبار المريبة
عمر سليمان صاحي, مرتضى منصور اغتيل, انفجار في اخر الشارع, الكافيين بيقتل, كنتاكي بيجيب تشنجات, الاكياس البلاستيك مفيدة للمعدة. موقع ام محمد الاخباري طلع خبر عاجل, قبل ما تفتي وتعمل شير وتتخانق مع صحابك اللي بيقولوا الكلام ده غلط, جرب جوجل صديق الطالب المثالي. بطل تفزع الناس على الفاضي ولو مش مصدق اوي, اسأل الاول.
٦. الجو تحفة في البدرشين/ حفلة كايروكي في الساقية/مولد السيد البدوي/حفلة عمرو دياب في الساحل/الكيلو 4.5 وما الى ذلك
بسميهم “بارتي إن ذا ساحل بيبول”, الناس اللي لازم تعرفك هما فين وبيعملوا ايه وقد ايه هما “بارتي بيبول” وانت ممل وانت قاعد في القاهرة. دول اللي بسببهم مارك زوكربرج ندم على اليوم اللي اخترع فيه فكرة Facebook Location
٧. جمعية الرفق بالحيوان/ بالمرأة وكده
اللي هما بيعملوا شير لصور وبوستات ليها علاقة بالحيوانات الهربانة او الضالة او الستات واللي بيلبسوه او ميلبسوهوش وكده. طبعا كلها حاجات مهمة ولطيفة بس احيانا تو ماتش الصراحة خاصة في بلد الطبقة المتوسطة فيها مش لاقية تاكل. جرب تسأل صاحب البوست بتاع الكلب الضال “متاخده في بيتك” هتلاقي الرد بنسبة 99% “لا ماما بتقرف اوي”.
٨. ايه الثرو دي يا حمار/رجالة في الملعب
الماتش شغال وفيه ناس بتقتبس دور محمود بكر وتعلق على الماتش لايف كده على التايملاين بمعدل ابديت لكل 3 ثواني ويا سلام بقى لو ماتش اجنبي والعياذ بالله ويتقمصوا دور الاستاذ الدكتور حازم امام ويشرحوا ويعدلوا على مورينيو الحمار اللي مش عارف يدير الفريق, لو بتتخنق, افصل من فيسبوك لمدة الماتش بالاضافة الى ساعتين/ ثلاث ساعات بعده على حسب النتيجة.
٩. فلان الفلاني is engaged to فلانة الفلانية
ورسمة الخاتم ومليون كومنت ولايك اغلبهم يا إما “اللهم بارك فيهما وعليهما واجمع بينهما في خير” او “ايه ده يا بوب السنين” او صاحبات العروسة “الله يا حبيبتي مبررررررررررررروك يا قمممممممممممر” وقلوب ودباديب وجليتر وكده, اعمل لايك في صمت عشان اكتشفت مؤخرا ان اصحاب الحوار بيعدوا اللايكس ويشوفوا مين الوحش اللي مباركش.
١٠. اغاني شيرين
قلبي الضعيف لا يحتمل! فقرة يادي يادي يادي المشاعر دي كتير على قلبي والمصحف! يا ستي قوليله انك بتحبيه او سيبوا بعض, انا مالي اساسا؟!
١١. ههههههه يا مرتضى منصور/ احمد موسى/باسم يوسف/ابو حفيظة
احيانا الحاجات اللي معمولها شير بتبقى لطيفة بس انا بصفتي شغلتي الكتابة فكرة “هههههههه” دي بتعصبني لانها لغويا رايحة في داهية.
فيسبوك اداة للتواصل الاجتماعي, لو بتفكر تكتب حاجة على فيسبوك تخيل انك بتقولها وانت قاعد مع اصحابك وشوف تعليقاتهم هتكون ايه وانت تعرف ينفع تكتبها ولا لا!
