مش عارفة ازاي، بس حسب كتب التاريخ يعني «مصر طول عمرها بلد الأمن و الأمان و الإستقرار» و في نفس السطر يقول لك «و طول عمرها مطمع للغزاه».
دول ١٢ غازي بالترتيب الزمني من الأقدم للأجدد.
١. الهكسوس
«الهكسوس» مصطلح مصري جيّ من «حيقا خاسيويت» يعني الحكام الأجانب.
قبائل بدوية اختلف المؤرخين على أصولهم بالضبط بس اللي قدروا يوصلوا له إنهم كانوا من قارة آسيا. من حوالي ٧٠٠٠ سنة كانوا بيتفسحوا في مصر و الشام، دام احتلالهم لمصر ما يقرب ١٠٠ سنة. بس بعد كدا جالهم أحمُس الأول.. و عينك ما تشوف إلا النور. ما قامت لهمش قومة بعد كدا.
٢. الآشوريين
«آشور» هو الإبن الثاني لسام ابن نوح (عليه السلام). و المفروض إن الآشوريين دول من سلالته، و هي مجموعة عرقية جاية من شمال بلاد الرافدين – و لسه موجودين بالمناسبة. من ضمن فتوحات الإمبراطورية الآشورية كانت مصر، في ٦٧٧ ق. م. يعني من حوالي ٣٠٠٠ سنة، بس ما عمّروش قوي.. قعدوا حوالي ١٣ سنة و جِه فرعون مصري إسمه إبسماتيك الأول (أو: رع واح) و طردهم و عمل الأسرة الـ٢٦.
٣. النوبة
«تهارقا» كان فرعون نوبي قدر إنه يهزم «إسرحدون» الآشوري، بس مش لفترة كبيرة. بعد سنتين رجعوا الآشوريين و خلّوا «تهارقا» يهرب.
*الممثل الأمريكي وِل سمِث مثّل «تهارقا» في فيلم The Last Pharoah.
٤. الفُرس
كان أبو ملك الفرس، «قورش الأكبر»، طالب إيد بنت أحمس الثاني، بس أحمس رفض و اداله بنت ملك تاني فغضب «قورش» و قعد يزن على ابنه «قمبيز التاني» على إنه يحتل مصر، و حصل فعلًا. و كان من السهل جدًا احتلال مصر في الوقت ده عشان كان أغلب الجيش من المرتزقة و دول اللي ساعدوا الفرس انهم يحتلوا مصر. تم الإحتلال الفارسي لمصر من ٥٢٥ ق. م. لغاية ٣٣٢ ق.م.، و سمي هذا العصر بالعصر الإخميني.
٥. الإغريق
الاسكندر الأكبر بقى مَسَح الفُرس من موطنهم لغاية مصر. لما جِه مصر المصريين استقبلوه استقبال ولا كأنه المهدي المنتظر. العصر الإخميني كان شديد شويتين على مصر، على عكس الإسكندر، ما كانوش بيتمتعوا بالذكاء السياسي.. عادوا المصريين و هدموا معابدهم و ما حترموش عادات البلد و تقاليدها. بس الإسكندر ما عاشّ كتير، مات بعد فتح مصر بـ٩ سنين.
٦. البطالمة
و عشان الإسكندر الأكبر ما كانش عنده ولاد، فراح «بطليموس الأول» أعلن نفسه فرعون و أسس المملكة البطلمية. و ازدهرت مصر الفترة دي بالعلم و الوحدة الوطنية. استمر الاحتلال البطالمي لغاية ٣١ ق.م.
٧. الروم
هزم «غايوس يوليوس قيصر أوكتاڤيانوس» المعروف بـ«أوكتافيوس» أو «أغسطس» كليوباترا السابعة و أنطونيوس في معركة أكتيوم البحرية، و أسس الامبراطورية الرومانية و كان «أوكتاڤيوس» أول امبراطور ليها. الأول الروم سابوا المصريين يمارسوا دينهم و اللي كان وثني زي الروم ساعتها، بس بعد ما ظهرت المسيحية في فلسطين، و دخل كتير من المصريين في المسيحية على يد القديس «مرقص»، راحوا مانعينهم من حرية العقيدة. فضلت مصر تحت الاحتلال الروماني لغاية ٣٩٥ ميلاديًا.
٨. البيزنطيين
مصطلح «بيزنطة» جاي من «بيزنتيوم» و هو اسم مدينة القسطنطينية قبل ما تبقى عاصمة «قسطنطين الأول». في ٣٩٥ م الإمبراطورية الرومانية اتقسمت لإمبراطوريتين: الإمبراطورية الشرقية «البيزنطية» و الإمبراطورية الغربية. و مصر بقت تابعة للشرقية. كانوا بعتبروا نفسهم روم بس الفرق بينهم و بين الروم القدام إن دول مسيحيين و بيتكلموا باليوناني و التانيين وثنيين و بيتكلموا باللاتيني. الروم الشرقيين حرصوا انهم يحافظوا ع العادات و التقاليد الدولة الرومانية القديمة. الدولة البيزنطية في مصر استمرت لغاية ٦١٩ م.
٩. الفرس تاني
مشاكل سياسية كتير شغلت البلد فانتهز الفرس الفرصة و زحفوا من موطنهم لغاية مصر بقيادة ملكهم «خسرو برويز»، واخدين في رجليهم مستعمرات الدولة البيزنطية في طريقهم لمصر. في سنة ٦١٩ م احتلوا مصر و قعدوا فيها حوالي ١٠ سنين لغاية ما«هرقل» جالهم بأسطوله في سنة ٦٢٢ م عند الإسكندرية و قدر يوقف الزحف الفارسي و خلّى الفرس ينسحبوا من مصر سنة ٦٢٧ م، و رجعت مصر تحت الإمبراطورية البيزنطية.
١٠. العرب
بعد كدا جِه عمرو بن العاص بجيش عربي من شبه الجزيرة العربية و هزم الجيش البيزنطي و خرجهم من مصر سنة ٦٤٢ م و فضلوا في مصر لغاية ٦٦١ م.
و بعدين جم الأمويين؛ مجموعة من العرب من أنصار معاوية بن أبي سفيان – مؤسس الخلافة الأموية. إسمهم الأمويين نسبةً لأميَّة بن عبد شمس من قبيلة قريش.هجموا على مصر سنة ٦٦١ م و قتلوا الوالي العربي و بقت مصر من ضمن ٤٥ دولة تابعة للخلافة الأموية.
و بعديهم جُم العباسيين و بعدين الطولونيين و بعديهم العباسيين تاني.
و هنا تحولت اللغة الرسمية للغة العربية و الديانة الرسمية للإسلام، و العاصمة للفسطاط.
١١. الأتراك
«الإخشيديين»، و الإسم ده يعود لسلالتهم التركية «بنو إخشيد». حكموا مصر و الشام من ٩٣٥ لـ٩٦٩. استنجدت الخلافة العباسية بصد الفاطميين، بس الفاطميين خلصوا عليهم.
١٢. الفرس تالت (مش كده يا جماعة)
جُم المرة دي بمسمى الفاطميين نسبةً لفاطمة الزهراء بنت محمد بن عبد الله. و يعتبر الخلافة الفاطمية من الخلافات الإسلامية بس هي الوحيدة اللي اتبنّت المذهب الشيعي/الإسماعيلي كمذهب رسمي. أسسوا مدينة القاهرة و خلوا مصر المركز الروحي و الثقافي و السياسي للدولة الفاطمية الممتدة من الحجاز للشام لشمال إفريقيا. و هنا ازدهر التعليم بحيث ان تم إنشاء جامعة الأزهر برضه نسبةً لفاطمة «الزهراء». سقطت الخلافة الفاطمية على يد الأيوبيين سنة ١١٧١ م.
المهم إن مصر، بلد الأمن و الأمان و الإستقرار، فضلت كدا تتقلب بين إيد ده و ده، من الأيوبيين للأتراك تاني و بعدين للمستعمر الغربي للمرة الماعرفش كام و فضلوا يتخانقوا عليها و الشعب المصري الغلبان قاعد لا حول له و لا قوة… لغـــــــــــــاية ١٩٥٢. بس ماعداش عليها كام سنة و وقعت في إيد عدو بس جديد بقى المرة دي.
