طبعا انت زهقت من الكلام عن التحرش, البنات اصلها زنانة اوي في الموضوع ده يا جدع!
انا قررت ابص على التحرش من وجهة نظر أدبية شوية, وده لأن الشعب المصري مسلي بطبعه و”كريتيف” جدا في الجمل اللي ممكن يقولها لبنت في الشارع ومن هذا المنطلق الادبي قررت أجرح اكثر خمس جمل مسلية البنت المصرية بتسمعها في الشارع.
١. يا مكن عمره ما اتركن
انا في الجملة دي احتجت استعين باصدقائي من الولاد للنزول بالترجمة على غرار الاستاذ انيس عبيد وطلع المعنى أقذر مما كنت أتخيل, عامة المكن اللي بيتركن أو اللي مبيتركنش مش مشكلتك, لو محتاجة اجابة لطيفة للجملة دي قولي “تعالى اخدك التوكيل” واطلعي بيه على بابا وهو هيتصرف.
٢. مش حقه يسيبك واقفة في الشارع كده
طبعا لأن اي بنت واقفة في الشارع, أكيد واقفة عشان تركب في عربية واحد راجل. مش اوبشن انها مستنية مواصلة او تاكسي او واحدة صاحبتها مثلا. وعشان كده عادة فيه ردين الاول هو انك تقوليله “ماهو **** زيك بالظبط” وتمشي. يا إما تسأليه بصوت عادي مفيهوش زعيق أو خوف “أفندم؟” في الاغلب عشان هو جبان هيسيبك ويمشي ولو ممشيش استعيني بكل قدرات نادية الجندي ونبيلة عبيد على الشرشحة ووريه مقامه في الشارع, التحرش مفيهوش كسوف, لو هو مش مكسوف متتكسفيش انتي كمان.
٣. ايه الصدر, الرجلين او الجسم الجامد ده (أو أي عضو اخر من أعضاء جسمك)؟
ده عادة بيقولها وهو ماشي ومش ناوي يقف يكمل الحوار, مترديش والاهم, دي مش مجاملة فمبتبتسميش او تمشي, اعتبري في كلب بينبح ومتعبريهوش بأي رد فعل.
٤. هو شارع (ميكي ماوس, الشهيد ميكي ماوس, طريق ميكي ماوس, مدرسة ميكي ماوس) فين؟
ده متحرش من الخمسينات او معتبر باباه مثله الاعلى في التحرش, في الحالتين المفروض يصعب عليكي وتكرمشي خمسة جنيه في ايده, ده اخره والله ومش مؤذي على الاطلاق.
٥. انا مش بعاكس والله
لا واقف في طابور الجمعية بتجيب رز طبعا! ده سيبيه وامشي وغيري مكانك بسرعة لانه من النوع اللازق زي الامير كده ومش ناوي يمشي خالص وبيعتبر التهزيق تجاوب منك فبيلزق اكتر, لو فيكي صحة ومواراكيش حاجة ممكن تقربي منه بابتسامة لطيفة وتاخديه مقص يقع على الارض بس غالبا هيقوم ينفض هدومه ويكمل تحرش عادي.
ده التحرش اللفظي باختصار مراعاة للرقابة, للتحرش البدني قصة اخرى…اوعى تغير المحطة…
