طيب, التحرش اللفظي مقدور عليه, بمعني انك ممكن تردي او تعملي مش سامعة وده النصيحة اللي الولاد شخصيا بيقولوها للبنات اللي في حياتهم لكن نعمل ايه في الرجل اللي بيمد ايده في الشارع. انا شخصيا متألمة من كتابة مقال يساعد البنات على التصرف حيال المتحرشين ودي مش سلبية, ده تعايش مع أزمة اتمني تكون عابرة.
تعرفي على خمس انواع من المتحرشين البنت بتقابلهم في الشارع
١. المس واجري
دي المدرسة المصرية الاصيلة في التحرش, الفكرة هي انه يمد ايده على اي جزء من جسم البنت ويجري (الهواية المفضلة لصبي المكوجي اللي على عجلة), الحل قدامك حاجة من اثنين, يا تقتدي بأي عداء وتجري وراه تجيبيه من قفاه (انا بشجع الحل ده) ياإما تستعوضي ربنا (طبعا فيه الحل الخفي وهو ان راجل يسترجل ويوقفه هو).
٢. اللهو الخفي في المواصلات العامة
الراعي الرسمي للتحرش في الاوتوبيس والميكروباص, الراجل اللي لا مؤاخذة بيلزق ويتحجج بالزحمة, كوعك في بطنه بذوق وهو هيمشي على طول, او امسكيه وهو لازق فيكي وصوتي بس ما اوعدكيش ان الكل يتدخل زي ما انتي متوقعة.
٣. أحبك في الطابور
ده الراجل اللي بيقف في زحمة الطوابير عشان يلزق في اي بنت, ايام دراستي في جامعة القاهرة كان فيه راجل مستلم شباك المصاريف الاربع سنين وكل مرة يطلع اصلا “بيسأل على حاجة” ومش طالب في الجامعة اساسا. حلك معاه هو اللي انا عملته في سنة ثالثة, مقص سريع مع ركبتي في منطقة حساسة, الافيه انه فضل عايش للسنة الرابعة بس جري من الطابور اول ما شافني.
٤. ثواب الجماعة
دي مجموعة العيال ما بين سن 12 و 16 سنة اللي بيخرجوا في مجموعات في الاعياد او متسربين من المدرسة ويحاوطوا البنت ويتحرشوا بيها, استلمي الاضعف بدنيا فيهم وجرجريه هو بره الدايرة وانتي بتصوتي, اضربي المربوط يخاف السايب وطبعا مش عيب ولا حرام انك يكون معاكي اي نوع من السيلف ديفنس. انا شخصيا معايا جهاز الكتريك وبتحمل المسؤولية في اي كمين وعادة الظابط بيسبني عشان فاهم انا محتاجة الجهاز في ايه.
٥. حبوب الشجاعة
ده الولد المبرشم اللي عادة بيجي في منطقة من المناطق الساخنة للتحرش زي وسط البلد ويتعرض لك. اقفي وواجهيه واضربيه لو لزم الامر, المتحرش بطبيعته جبان, دي حقيقة واقعة.
و بمناسبة الموضوع ده:
نصائح عامة لمجابهة التحرش
مش جايباها من الانترنت, كل اللي جاي حاجات انا جربتها وبتنجح بصورة كبيرة, شجع البنت اللي في حياتك تحمي نفسها صح.
أولا
اسأليه بصوت هادي مش واطي ومش بيزعق وانتي بصاله في عينيه “انت بتعمل كده ليه” او “انت فاهم انت بتعمل ايه” أو ” على فكرة القسم مش بعيد”. اراهنك انه هيجري من قدامك في لحظتها.
ثانيا
لو لوحدك في الشارع او مفيش حد حواليكي اتحركي في اتجاه حتة انتي عارفاها. متقفيش لحظة بس متجريش, امشي بالخطوة السريعة زي عسكري الدرك.
ثالثا
صوتي وقولي “حريقة”, متقوليش حرامي ومتقوليش متحرش ومتقوليش الحقوني.
رابعا
لو الشارع فيه راجل كبير او محل تعرفيه ادخلي قوليله لو سمحت احميني, الشهامة مماتتش في مصر, الناس بس مبتحبش تتدخل
خامسا
وبنجاح ساحق, امشي ومفاتيحك في ايدك, بين كل صباع وصباع يكون طرف المفتاح ظاهر, اللي يقرب منك بالمفاتيح في وشه وبرضه امشي بسرعة متقفيش, محبكش الخناق او اثبات الموقف. نطي في تاكسي حتى لو هيمشي بيكي لحد اخر الشارع, في الحالة دي هيني قرشك جدا.
واخيرا
والنبي يا شيخ, مش ضروري تتخانق مع المتحرش بس اقف مع البنت احميها لحد ما هو يمشي. الرجولة مش خناق, الرجولة اثبات موقف.
