عشان مصر ام الدنيا.. و اعتقد خلاص انها قربت و هتبقى اد الدنيا اهي، فيها حاجات محتاجة تختفي حالياً مش موجودة في اي حتة في الدنيا. الحاجات اللا منطقية في شوارع مصر تقريباً ما تتعدتش! بس دول اكتر 5 مظاهر في مصر محتاجين يختفوا:
١. علاقة المية بالطراوة
احنا في القرن الواحد و العشرين و لسه المواطن المصري البسيط مقتنع انه لما يرش الاسفلت بخرطوم المية هتجبله طراوة في ايام الحر الشديد! ازاي معرفش! المية من الحر الشديد اصلا بتكون اتبخرت من قبل ما تلمس الاسفلت! ماخدش في مادة الدراسات الاجتماعية يا عم الحاج ان قطرة المياه هتبقى اغلى من قطرة البترول و ان بطريقة استغلالك للمية كده احفاد احفاد احفادك مش هيلاقوا يشربوا؟!
٢. الشارع مش بتاع حد
و عشان الشارع ملكية و مش بتاع حدن اصحاب القهاوي و المحلات بيقرروا يوسعوا البيزنس بتاعهم و يخدوا الرصيف لحسابهم. خصوصاً ايام الماتشات ممكن تلاقي قهوة واخدة الشارع كله عادي! ممكن الشرطة تنزل تلمهم شوية بس هما زي الزومبيز دايماً بيرجعوا تاني..
٣. المطبات
في مصر.. المطبات اظهر فجأة في اي مكان.. في اي شارع.. و على الطرق السريعة بتلاقي بين كل مطب و مطب.. مطب.. انا مش فاهمة ايه المغزي من المطبات غير انها بتشتتك و بتطلعك من مود السواقة. و هو انا عامة يعني مابشوفش المطبات..خالص..
٤. الزحمة
الزحمة احد العلامات الي بتميز مصر! فيه زحمة في كل دول العالم تقريباً بس مش زي الزحمة بتاعتنا. في اي مكان بيبقى في سبب واضح للزحمة لكن احنا عندنا الزحمة بسبب و من غير سبب. الناس ممكن تركن عربيتها في نص الطريق في الزحمة عشان ينزلوا يشوفوا ايه سبب الزحمة و ده ما بينتجش عنه غير زحمة اكتر.. او لو فيه حادثة او خناقة لازم نقف نتفرج و نصور الي بيحصل.
٥. نفس الاعلان كتير
ايه الغرض انك تعلق نفس الاعلان على كل عمود نور او ركن على الطريق؟ هو هو نفس الاعلان بنفس الديزاين ما فهوش اي تغيير بس متكرر كتير فشخ ورا بعض! انا مش عارفة ايه الهدف من كده بس لو كان عشان تقنعني بفكرة معينة او اشترى منتج معين فانا اقتنعت بالعكس.
