تقريباً انت بتقضى معظم حياتك اونلاين (اذا مكنتش كلها). تقفل اللاب توب، تقوم تفتح التابلت او الموبايل. و اكيد لازم تتكعبل في شوية حاجات مستفزة ترفع ضغطك، عشان زي ما انت عارف احنا عندنا اسوأ خدمة انترنت في العالم بلا منازع. دول اكتر 10 حاجات مستفزة ممكن تقابلها اونلاين:
١. التنين الصغير
التنين الصغير الي بيطلعك و كأنه يعني بينبه حضرتك انك غير متصل بالنت. و انت بتبقى متصل عادي جداً و متعرفش العيب فين و لا من مين و تفضل تفصل و تفتح في الراوتر.
اعتقد اختيار التنين للتعبير عن عدم اتصالك بالانترنت لانك من غير انترنت كأنك بقيت في عصر الدينصورات، أو لأن ال تي-ركس ايديه صغيرة اوي و مش عارف يعمل بيها حاجة، فأنت بقيت زيه بالضبط من غير انترنت. بس بوص عندك ديه، انت لو ضغطت سبيس هتلاقي التنين ده بدأ يتحرك و يقابل صبار مفروض ينط من فوقيه لما تضغط سبيس. و بكده تقدر تضيع وقتك سواء انت اونلاين او اوف لاين. شكراً جوجل!
٢. الفيديو مش لبلدك
فيه فيديوهات اول ما بتنزل بتبقى غير متاحة لمصر! السبب غير معروف.. الموضوع ده ممكن مايضيقش ناس كتير، بس لو انت فان لسيبرتي معين و نزل فيديو مش متاح في مصر هتحس بالاهانة و الخيانة! مصر مش وحشة.. و من حقنا نتفرج على كل الفيديوز!!
٣. الصوت ده جاي منين
لما تفتح اي صفحة و بعدين تلاقي مزيكا او فيديو اشتغل مزعج جدا و انت مش عارف جاي منين و عايز تقفله و في الاخر تضطر انك تقفل البراوزرز كله عشان تتخلص من الازعاج ده
٤. رسالتك لم تصل!
عارف انت اللحظات المهمة الي بتتشات فيها مع حد مهم بالنسبة لك و الكون و الفيس بوك و الانترنت يقرروا يتأمروا عليك و كل الكلام الي عمال تكتبوا مش راضي يوصل.. اللحطات ديه دمرت علاقات حلوة كتير!
٥. ام ال CAPTCHA
هى الكود الي بيبقى في بوكس و مفروض تكتبه عشان النظام يتأكد انت بني ادم و لا روبوت. السخيف ان الكود ده CAPTCHA
يجي صعب لدرجة متتقريش و تفضل تحاول و يجيلك الاصعب منه. اكيد المهندسين ممكن يلاقوا حل الطف شوية.
٦. تابز كتير .. اوي
لما تفتح صفحات كتير اوي لدرجة انك مبقتش عارف كل صفحة بتودي فين عشان العنوان مش باين. عارف ايه الاسوأ؟ ان كل الصفحات تكراش و تضطر تفتح كل حاجة تاني من الاول
٧. الدايرة الرمادي
الدايرة الي بتظهر و انت بتتفرج على فيديو و يقف! و يا سلام لو النت اقطع و اضطريت ترفرش الصفحة و تتفرج من الاول. انت متخيل ان فيه دول النت عندهم سريع جداً لدرجة انهم عمرهم ما شافوا الدايرة الرمادي ديه في حياتهم، و لا اضطروا يقعدوا حاطين ايديهم على خدهم مستنين الشريط الرمادي الي تحت الفيديو يسبق الشريط الاحمر!
٨. اعلانات
انت ممكن تكون جامد جداً و محدش بيجبرك على حاجة .. بس اليوتيوب هيجبرك تشوف اعلانات بالعافية و لو اول كام ثانية منه. الجديد بقى ان بقى فيه اعلانات بتشتغل في نص الفيديو و انت بتتفرج و لازم تتفرج عليها كلها!! ليه الغلاسة ديه؟! يوتيوب لو اتضغط عليه شوية و خد شوية فلوس كمان ممكن يخلينا نشتري المنتجات بالعافية قبل ما نتفرج على اي فيديو!! فيس بوك نفس الحكاية.. بوستات بتظهرلك على تايم لاين لصفحات انت مش عاملها لايك زي مانت بتقرا المقال ده بالضبط.
٩. ال توول بارز الكتير
طبعاً اكيد اقعدت قبل على كمبيوتر اهلك او واحد صاحبك مالوش في الكمبيوتر و صدمك بحجم التوول بارز الرهيب ألي عنده. و بعد كده يعد يشتكي النت بطيء اوي.
