لسبب غير واضح، سكان القاهرة بيتعملوا مع سكان الاقاليم كأنهم جايين من عالم تاني، و هى هى نفس الاسئلة الي بتسمعها من كل واحد قاهري، متعرفش هما متفقين علينا و لا ايه، و بما اني عانيت سنتين من الاسئلة ديه و ما زلت بعاني، فانا حابة انقذك من الاحراج .. بعد هاي ازيك عاملة ايه منين (انا من طنطا بالمناسبة) و اكيد اكيد ردك هيبقى (اجدع ناس والله) حاول تتفادى الكام جملة الجايين دول:
١. انت ساكنة فين هناك؟
“انتي منين من طنطا؟” “انت ساكنة فين هناك؟ اصل انا مرات بنت عمة خال جوز اختي ساكنة هناك” “قوليلي انتي ساكنة فين بالظبط! اصلي جتلكوا طنطا مرة و انا عندي سنتين”
طنطا صغيرة اه بس ده مش معناه انك هتبقى عارف انا ساكنة فين , ان مش كلنا عارفين بعض هنال بالإسم.
٢. *اندهاشة* و بتيجي القاهرة ازاي؟
فيه اختراع جامد اسمه “قطر” و بتروح تقطع تذكرة من المحطة و ممكن يوديك اي حتة في مصر
٣. انت عايشة في غيط و كده؟
لأ انا مش عايشة في غيط *و مش لازم تتبع السؤال ده ب “يعني انت مبتعرفيش تزرعي؟” لو مفهوم الزراعة عندك الفول الي بنزرعه في طبق فيه قطن و احنا في رابعة ابتدائي، فيبقى بعرف ازرع
٤. يعني معندكوش بقر و جواميس؟
ما بقاش لاقية رد مناسب! بقر و جواميس ايه؟! ده زي الاجانب كده لما بيبقوا فاكرين ان المصريين عايشين عند الاهرامات و بيركبوا جمال!
٥. بس شكلك مش من طنطا
ديه عنصرية على فكرة و ستريوتايبنج بقى و كده! ليه متخيلني اني بصحى الصبح بالجلابية اكل الفراخ و احلب الجاموسة.. ستوب ستريوتيبج بيبول!
