مصطلح مفتكسة جاية من “إفتكاس” فعلها “يفتكس” و هي تعادل في اللغة كلمة “يخترع”.
في الواقع..كلامنا معظمه بقى مفتكس، من غير ما نلاحظ إنه مفتكس. و لو لاحظنا بنعديها من غير ما نقف و نستفسر و نلاقي للكلمة دي أصل ولا فصل.
١. فاكس
كان نفسي الاقي للكلمة دي أصل تاني، بس الحاجة الوحيدة اللي قدرت اوصل لها (مع الأسف يعني) إن أصلها يرجع لكلمة “Fake” يعني مش أصلية أو ركيكة.
٢. مستكنيص
كلمة طلعت في أواخر التمانينات في أوائل التسعينات.. في الوقت ده. و أصلها يرجع للسكون، يعني لو حد “مستكنيص” يعني هو “مستكين” و غالبًا الـ”يص” اللي في الآخر دي جاية من الكلمات الإنجليزية اللي بتنتهي بـious أة ous، زي nervous و serious و كدا.
٣. رِوِش
رِوِش، يروِّش، روشنة؛ جاية من “الروشه” و هي حالة عصبية. و يقال إن أول ناس يستخدمة المصطلح ده همَّ اللي بيربوا حمام ع السطح. “الحمامة دي مرووشة” يعني الحمامة عندها رعشة ديناميكية دائمة في رقبتها.
٤. أنتخة
أنتخة بقى جاية من “إنتخاء” أو من “نخ”.. إنتخى عليه في اللغة يعني: تكبر عليه. إنما “نخ” يعني لما تقول للجمل الواقف ينِخ لامؤاخذة ينخ=يريّح و يقعد ع الأرض.
٥. ألشة
مصطلح لقيط، مالهوش أصل ولا فصل. ظهر في العالم الكروي، “الكرة ألشت” يعني الكرة طلعت برة الهدف. فلما صاحبك يقول لك “ألشة” يبقى معنى كدا إنها كانت المفروض تكون تضحك و تقلب نكتة حلوة بس سخَّفت منه و “ألشت”.
٦. سفّ
كلمة “سف” أصلها “سفه”، سفه عليه= أهانه و عامله بجفاء.
٧. هجص
هجَّص، يهجِّص، تهجيص أو هجْص. المفروض دي كلمة من أصل فرعوني، و اتنقلت للحضارات الغربية تحت اسم hoax
