مين مننا مخسرش شوية من أصحابه في الطلعة دي؟ تصحى على تليفون او مسج من صديق قديم مشفتوش من ايام فحت البحر(اللي هو حفر قناة السويس الاولانية) يقولك لازم اقابلك في حاجة ضروري. تنزل تقابله تسمع سيناريو مبيتغيرش عن كيو نيت وقد ايه انت هتعمل فلوس من البيت أو وانت قاعد على البحر, تقع فيها وتشتري حصة وتبتدي تلف على الاصحاب القريبين والبعاد والبواب وابن البواب والجنايني وابن اخته وزمايلك في الشغل, ده غير انك بتدخل ماما وخالتك وابن اختك اجباري اساسا.
بس هي ايه كيو نيت؟
هي فكرة البيع المباشر عن طريق النظام الهرمي, يعني تبيع منتج من منتجات الشركة لاصحابك فتكسب نسبة من تمن المنتج ولما هما يبيعوا لاصحابهم انت برضه تاخد نسبة اقل وهكذا. من الاخر كل ما تدخل ناس عن طريق رقم التعريف بتاعك ما تكسب فلوس وانت قاعد في البيت.
بعد ما تقريبا مصر كلها سمعت عن كيو نت وخسرت اصحابها بسبب كيو نت (السبب الرئيسي انك لما ترفض صاحبك بيقفش عليك باعتبارك خنته مع مراته تقريبا) الناس ابتدت تسيب شغلها وتركز عليها لدرجة خلت دار الافتاء تتوقف وتقول على فكرة الحوار كله حرام وغير جائز بصفته نوع من انواع النصب.
انا مش بقول هو نصب ولا لأ لاني عمري ما دخلته بس مثلا لاحظت ان 99% من الناس اللي اعرفها اللي دخلت كيو نت دي مكملتش فيه واللي كملوا مكسبوش فلوس زي ما هما فاكرين او كسبوا فلوس بس خسروا الناس اللي في حياتهم. تنوعت الاسباب وعمري ما فهمت كيو نت بجد وعمري ما اقتنعت بالفكرة.
فكرة ان الشركة مثلا بتغير اسمها كتير واتمنعت في دول كتير دي قلقني, حتى لو انا مش شايفة المشكلة بعيني او مش قادرة احط ايدي عليها لكن انا شامة ريحتها. اصل لو كلنا سبنا شغلنا وقضيناها بيع مباشر او غير مباشر, مين اللي هيشتري ومين اللي هيعمل المنتجات اللي هتتباع.
اللي انا ملاحظاه ان طلبة الجامعة اليومين دول رجعوا يقعوا في الحوار وحاسة اني لازم اقولهم ياخدوا بالهم ويقروا شوية عن الموضوع.
من الاخر, عايز تدخل على اي شركة من دول وتعمل مصلحة؟ وماله مش عيب! بس متبقاش لازقة ومتخليش الموضوع يسيطر على حياتك ويخسرك شغلك واهلك واصحابك والمحيطين بيك واعملها بصياعة, متوقفش الناس اللي متعرفهاش في الشارع تقنعهم بالفكرة لانك هتتاكل علقة ملهاش حل.
