بصفتي بنت عايزة يبقى شكلها حلو, بتابع الموضة العالمية والمحلية… برافو, صح؟
لا غلط! انا بعاني مع المفهوم المصري للموضة والمفاهيم الخاطئة للبنات فيما يتعلق بالموضة الحريمي.
هيا بنا نخوض في معركة الرعب المستمرة وهي موضة البنات في مصر.
١. جلد النمر- الحمار الوحشي- جلد اي حيوان متوفي
هو مش وحش, وشكله لطيف, بس عامة يعني انتي مش نمر فمينفعش يا اختي الطقم كله يبقى نمر, نوعي, غيري, قطعة واحدة تكفي, وحياة اغلى حاجة حاجة عندك, متتحوليش لذكر النمر المتربص بفريسته, احنا مش ناقصين رعب!
٢. نظرية قمع المرور الفسفوري
انتي مش سايس في باركنج سيكويا ومش قمع التصليح اللي بنحطه واحنا بنغير العجلة على الصحراوي بالليل, ثم ان موضة الفسفوري خلصت من 2013 اساسا وغير كده لو معذورة اوي في الموضوع يعني, برضه ركزي في قطعة واحدة واختاري لون ونوع قماش مش عاكس للضوء, بحس اني في فيلم فانيال ديستينشان وشبح الموت المضيء داخل عليا.
٣. اي حاجة لابساها احلام
دي قاعدة عامة, للتوضيح انظري الشكل بالاسفل
٤. لفة الهدايا
انتي محجبة وفرفوشة وبتحبي الالوان, وده شيء جميل. لكن انك تحشي سفنج في راسك عشان راسك تبقى كبيرة ده بيفكرني بفيلم مارس اتاكس او انك مخبية الخزنة فوق راسك, عايز تباني اطول البسي كعب, غير كده بلاش والنبي!
٥. بنطلون البمبوطية او بنطلون علاء الدين
لو انتي علاء الدين يبقى فين المصباح؟ مش عشان حاجة غير انه لازم يكون وزنك 40 كيلو عشان البنطلون ده يبقى شكله حلو عليكي ولما تجيبيه بتنقي الملون اللي مليان ورد ونقوشات, يعني بيجاما مطلعاكي عندك جنوط سبور في الجنب, برافو!
٦. الاي شادو والاي لاينر ومهرجان الوان 2015
بمنتهى البساطة, لو لقيتي نفسك بتختاري اكتر من ثلاث الوان اي شادو او الاي لاينر خارج بره عينيكي اهربي! محدش بيبقى شكله حلو في الطلعة دي خالص, لمزيد من المعلومات راجعي نظرية الكولور وييل او عجلة الالوان واختار 3 الوان بس ماشيين مع بعض. اكتر من كده بفتكر اي مهرج في سيرك مصر القومي وانا بخاف منهم الصراحة.
٧. ضوافر الساحرة الشريرة
لو ناوية تمصي دم عشر بنات عذراوات عشان تحصلي على الشباب الدائم ركبي الضوافر دي, لو ظروفك مختلفة يبقى لا! وبالمرة, بلاش حد يقنعك بانك تلزقي حاجات او ترسمي حاجات على ضوافرك لو انت عديتي سن العشرين.
٨. الجليتر ومشتقاته
انا حالفة متكلمش عن الموضوع ده عشان صحتي, اي حاجة عاكسة للضوء مش من مصلحتك فمتلبسيش حاجة بتفكر الناس بدبدوب ملفوف تحت الكوبري يوم الفالنتاين.
