اللغة المصرية العامية بطبعها لغة متطورة بتطور الزمن ومن أكثر الحاجات اللي بتتطور كتير مع الزمن هو لغة التعامل مع المرأة في الشارع المصري. تعرف معي على القاموس العصري للمواطن المصري في التعامل مع البنت المصرية.
تنقسم الكلمات الموجهة للبنات في الشارع الى عدة أوجه على حسب الغرض من الكلام الموجه (معاكسة, تحرش, تعارف, تعبير عن اعجاب, حقد طبقي, حسرة على مراته الوحشة, ايا كان).
مبدئيا, فاكر نظرية لكل مقام مقال والحاجات دي, لا البقاء لله, تعيش انت يا حاج. البنات بتسمع الكلام في عزاء, في فرح, في الشارع, في الجامع, في الكنيسة, في الشغل, في اشارة المرور, في الميكروباص, اي مكان والجديد كمان ان مش بس الكلام من رجالة, الستات بقت بتساهم في التعليق لفظيا على البنات.
نرجع لمرجوعنا…
١. الوله بالحيوانات والطيور
يا بطة, يا وزة, حمامة (ليها اكتر من معني جوه قلب بطن الشاعر طبعا), عصفورة, غزال , فرس, أسد (واحيانا مراته), جمل, قطة, وكل ما شابه. ليه؟ الله اعلم, فيه حاجات ليها ايحاءات جنسية وحاجات غير مبررة اطلاقا بس برنامج عالم الحيوان ليه تأثير غير طبيعي على لغة التحرش اللفظي في مصر. لما بسمع الكلام ده ساعات بسمع صوت المعلق في خيالي بيقول “وتتغذى على قشر البطيخ وموطنها الاصلي اول فيصل”.
٢. علامة الاستفهام والسؤال المبني للمجهول
يالا, ما تيجي, ما يالا بينا, ما تيجي نيجي, مش يالا, حتة, جتة, نخلة (بس ده في حالتي انا بس غالباًعشان طويلة) مرة,ولية, صاروخ, سلعوة (الله يقرفك), بطل, ربنا يهدك, وزيرة, سفيرة (الله يكرمك) هايجة (ده نفسيا اسمه اسقاط على حالتك انت مش حالتي انا), وتكة, ياضيق, ملبن, مكنة, فرتيكة وهكذا. كلها كلمات غير مبررة وعادة الرد عليها بشتيمة مثلا بتؤدي الى عواقب أقبح بكتير من الطرفين.
٣. درس الاحياء
دي أقبح انواع المعاكسات والتحرش اللفظي وكلها بتستخدم كل الالفاظ اللي ممكن تتخيلها ولا تتخيلها وكلها في نظاق جنسي عنصري وكلها بتدمر نفسية البنت بنفس الطريقة اللي الاغتصاب بيدمر نفسية البنت.
٤. نعم؟
فيه حاجات حقيقي مش مفهومة يعني مثلا لما راجل في الشارع او في مكان يقول “ايه كوباية الحلبسة دي؟”(الحلبسة هي حمص الشام الساخن المصحوب بالكثير من الشطة). انا المفروض في الحالة دي أشعر بالثناء والاطراء إني بفكرك بسناك مصري يتواجد على الارصفة والكورنيش بكثرة؟ التفسير اللغوي هو الوحيد هو الشطة معناها Hot وكده بس انا مش محتاجة اوجع دماغي عشان افهم المعاكسة.
٥. العرض المباشر
لايف اون ذا ستريت كده تلاقي واحد معدي يقول “انا عندي شقة كاملة من مجامعيه”, المفروض اقولك ايه غير “ربنا يوفقك”؟
٦. زمن الفن الجميل
هتسمعي حاجات زي براميل القشطة النايحة وصفايح الزبدة السايحة و “يا أه يا أه” (الله يرحمك يا توفيق يا دقن). وكلها حاجات مقتبسة من اعلانات وافلام ومسرحيات, اعتبريها فاصل كوميدي مقتطع في وسط اليوم وعديها تماما.
٧. السؤال من غير سبب قلة أدب
“انتي جامدة كدة ليه”, “انتي حلوة كده ليه” “انتي ازاي صاروخ كده” “انت ازاي ماشية كده” “انتي ازاي طويلة كده” “انتي ازاي سمرة كده”؟ الرد حالتين في دماغي “انت مال **ك” او “مش انا اللي عملتني على فكرة والمصحف” او اعمل زي فيروز و “اقف اشكر ربنا”.
