صفحة معقدين نفسيين و ناس كتير من متابعين الصفحة دي شايفين إن معظم الپوستس اشتغالات من الآخر.. بس في كل الأحوال الإبداع اللي بنشوفه في التعليقات تاريخي يا جماعة!
اللي داخل يسف
ده بيبقى زي معظم الشعب المصري اللي عاملين like ع الصفحة دي.. داخلين يتسلوا. بس الفرق النوع ده و “الأغلبية المتفرجة” إنه هو نفسه بيتسلّى و يسلّي الناس. و في الأغلب إن ده النوع المفضل بالنسبة للـ٣٥٠ ألف اللي عاملين like ع الصفحة.
اللي داخل ينصح
من النوع المحترم، بس ممل بصراحة. الناس اللي بتبعت أسئلة ع الصفحة دي لو كان تمرت فيها النصيحة ما كانش زماننا
قاعدين بنسف دلوقتي.. فبصراحة تاني، كونك بتدي في نصايح للنوعية اللي غالبًا بتشتغلنا دي مضيعة للوقت.
(هتقول لي ما السف مضيعة للوقت برضه، هقول لك لأ طبعًا! كتير ما الواحد بيشتاق للحظة يضحكها كدا على قد ما بنضحك على تعليقات السف، و أهي حاجة تخفف عن نكد اليوم الروتيني الطويل)
اللي داخل يدي درس في الأخلاق
من النوع التقيل جدًا، حاجة كدا استغفر لله العظيم! و انت مالك ياخي؟ حد اشتكى لك؟ حد عيّنك واصي ع الناس أجمعين؟ الپوست جرحت حيائك و مش ماشية مع عادات و تقاليد سعادتك، عادي ممكن تعديه من غير ما تضيف تعليقك العبقري اللي ولا هيفيد بنِكلة
بغض النظر عن الناس الرخمة و الناس اللطيفة و الناس اللي بيعلقوا و الناس اللي بيتفرجوا.. من الواضح إن مبدأ “كليات القمة” ده دمّر عقلية أجيال بحالها. معظم الپوستس عنصر مشكلتها الأساسي إن الولد من كلية قمة و البنت من كلية مش قمة و أهله مش موافقين عشان كدا و العكس. الموضوع ده لازم له وقفة بجد!
و حاجة تانية كمان، فيه ناس بتبقى بتتكلم ع الجامعة ولا كأنها كتالوج لسوق الرقيق.. حاجة مثيرة جدًا للإهتمام برضه.
