قواعد الشيشة الثلاثون (من واحدة بنت)

تحب اقولك على ثقافة الشيشة المصرية؟ اكيد لا. انت بتنزل كافيهات ومطاعم وعارف علاقة العشق والوله بين المصري ولي الشيشة.

الحقيقة انه برغم سيطرة الشيشة على ساحة ضرر الرئة المصرية الا انه بتفوت على الرجالة كيفية تعامل البنت المصرية مع الشيشة. اليك قواعد الشيشة الثلاثون من واحدة بنت على دراية بكل ما تحمله الشيشة من معاني.

١. الكيف مناولة

لما البنت بتشيش مبتعزمش الا على صاحباتها البنات من باب التعرف على المذاقات او التأكيد على كون الشيشة مكتومة او منفسة او “طعمها غريب, صح؟”

٢. حجر الصباح يسبق كل شيء

يعني البنت تحب تظبط دماغها في الصباح بالشيشة خاصة لو مقبلة على يوم صعب او مليء بالتوتر في حياتها. اعرف شخصيا عروسة نزلت لافة شعرها يوم فرحها بالرولو عشان تلحق حجر ما قبل الزفاف.

٣. رجل الشيشة الاول

لو البنت معتادة تقعد في مكان بعينه دايما يكون ليها رجل الشيشة المفضل اللي قادر على تحمل وفهم اهوائها المتغيرة دائما فيما يتعلق بالشيشة, الراجل ده بيتحول لصديقها الصدوق زي الكوافير كده ومش من حقك كراجل تغير منه لان المقارنة مش في صالحك.

٤. البلو ميست زي الخاتم السوليتير

لو بتحب بنت بتشيش وعرضت تعزمها على حجر “بلو ميست” وهو نوع امريكي من المعسل ذو طعم مختلف بس غالي حبتين. انت كده قدمتلها المعادل الموضوعي للخاتم السوليتير. مبروك مقدما!

٥. رجل الشيشة الشرير

راجل الشيشة اللي ريحته مش حلوة او دمه تقيل او بيجيب الشيشة غلط هو راجل شرير لازم يموت دلوقتي, اقلب وشك عليه شوية وهي هتشيلهالك وتردهالك.

٦. كله الا القص

كونك بتشيش زيها ده شيء محمود ولطيف ويحسب لك. لكن اختيارك للمعسل ممكن يدمر العلاقة. الشيشة القص والسلوم والتومباك بيحسسها انها خارجة مع غفير مقابر. خلي المعسل ده لقعدة القهوة مع صحابك بعد ما تروحها البيت. مشيها خوخ, الخوخ حلو مفيش كلام.

٧. الفحم الصغير اوجب

البنت دايما بتحاول تبين خبرتها في الشيشة وعشان كده بتستقي خبراتها من فيلم الكيف وتطلب فحم “سماسم” يعني صغير قال عشان يعني “الحجر ميتحرقش”.

٨. الدين لله والفليفورز متغيرة

مفيش بنت ثابتة على طعم او مذاق شيشة واحد , من الخوخ الى الدراق الى الليمون, كله على كله وكله بيتغير كل يوم.

٩. الشيشة مع الاكل والشرب وقبل النوم وبعده

ادمان الشيشة بالنسبة للبنت شيء بتكيف حياتها عليه, وبيتضافر المجتمع كله لتسهيل حصولها على حجر الصباح وحجر الوداع (اللي هو حجر قبل ما تروح).

١٠. الصحاب ماشيين بس الشيشة قاعدة

يعني لو الصاحبات خارجين في مكان مفيهوش شيشة مش اوبشن. امام البنت اختيارين اساسيين في هذه الحالة , يا رفض الخروجة او دفع البنات للخروج في مكان فيه شيشة او الاختيار الخفي لو بتحب صاحباتها انها تمشي بدري عشان “تلحق الحجر”.

١١. يعني ايه افطار من غير شيشة

مينفعش في رمضان تفكر تخرج مع بنت في مكان مفيهوش شيشة, ده غير ان مفيش في مصر مكان مبيقدمش شيشة في رمضان اساسا. كونك بتفكر في مطعم سوشي في رمضان ده شيء مهين ومستفز وابعد عنها دلوقتي عشان مخدتش الجرعة.

١٢. العزومة ليها اصول

لو البنت كانت لطيفة وقررت تشارك واحدة صاحبتها في شيشة الاصول بتقول انها تمسح المبسم بأيدها او تشيله خالص ان امكن قبل ما تقدم الشيشة لصاحبتها. الامراض منتشرة زي ما انت عارف.

١٣. لو الشيشة مش حلوة, اهرب!

لو لسبب ما يتعلق بالقدر البنت قررت ان الشيشة في المكان ده مش “ظابطة” وجربت كذا واحدة والراجل بتاع الشيشة ابتدى يتخنق. عندك قرار تاخده ما بين اختيارين, يا تاخدها وتروح مكان تاني يا اما تاخدها تروح مكان تاني. حذاري تعتبر ان الليلة خلصت وتقرر تروح بيها. هذه اهانة لا تغتفر.

١٤. المشاركة الوجدانية مطلوبة

البنت بطبيعة الحال معندهاش مشكلة تكون هي الوحيدة اللي بتشيش لكن لو انت بتحبها هتجرب وتدوق عشان “تحسها”, معلش هو ده قدرك, هات الشيشة لو على سبيل الديكور وصدقني هتدعيلي.

١٥. الحمل والشيشة

من الذوق ان البنت متشربش شيشة لو صاحبتها او قريبتها قاعدة وحامل. بلاش ندمر اجيال قادمة من الرحم اساسا, لو في اطفال في القعدة او واحدة حامل عوضي الشيشة فيما بعد

١٦. قعدة الشيشة في البيت

جرت العادة ان البنات تحلم ببيت الزوجية والفارس اللي هيخدها على حمار ابيض لكن البنت مدمنة الشيشة بتضيف تفصيلة صغيرة وهي قعدة الشيشة العربي في البيت وغالبا في البلكونة “عشان لو فيه بيبي وكده”.

١٧. حالة التنين الوردي

فيه مرة في الشهر هتلاقي البنت اللي بتشيش بتستهلك عدد احجار غير طبيعي. ده بسبب متلازمة اللي بالي بالك وتوتر الهرمونات الغير مستقرة, سيبها تقضي على الحجر وانت ساكت.

١٨. عندك شيشة فانيليا ايراني؟

البنات هي القوة الشرائية الدافعة وراء صناعة المعسل ولهذا السبب هتلاقي انواع والوان واشكال من المعسل البنات بتتكلم عليها. فانيليا, ميلك شيك, جوز هند بالقرفة,كبدة اسكندراني, حاجات غريبة مسلية البنات بتحبها, عدي الليلة وخلاص من غير تريقة.

١٩. المروحة بتبوظ كل شيء

لو فيه مروحة او تكييف حوالين الشيشة البنت بتتوتر من الشيشة واحتمال ان الحجر يتحرق. الشيشة مهمة والتكييف مهم وايجاد التوازن بين الاثنين شيء من دروب المستحيل ويجب عليك تفهم توترها في المسألة دي.

٢٠. المبسم الطبي حلو مفيش كلام

من المهم ان المبسم واللي يكون طبي وانه يجي في الكيس المقفول. دي ليها علاقة بالنظافة وانتقال الامراض ومش استعباط ولا رخامة من البنت, الشيشة بطبعها تتنقل بين الناس وده شيء مقلق, نحن لا نزرع الشوك بس الحرص واجب.

٢١. الحجر بيحلو اول ما تطلب الحساب

دي قاعدة ميتافيزيقية ملهاش تفسير. اول ما تطلب الحساب وهتقوم هتلاقيها مش بتقوم لأن “الحجر احلو فجأة” تتبعها “استنى شوية”. الصبر فضيلة في هذه الحالة.

٢٢. الشيشة بتنور, الله!

فيه سوق كبير للشيشة بكافة الاشكال, من الشيشة الميني لشيشة ميدوسا (انظر الشكل ادناه) للشيشة اللي بتنور او اللي بتغني, كل ما زادت الافتكاسات تقدر تعرف البنت اللي بتشيش بجد عن اللي بتشيش من باب الموضة. البنت اللي بتشيش بجد لن تقتنع بكل هذه الاختراعات وهترجع لاصلها للشيشة المعمولة في الورشة في الحسين وحجر الخوخ او التفاح الاصيل.

٢٣. الماشة والبنات

الماشة هي الة شبيهة بالملقاط الكبير سوية تستخدم لوضع الفحم على الحجر, لو البنت طلبت الماشة بنفسها ده دليل على قدرتها الخارقة ومعرفتها برغباتها فيما يتعلق بمدى سخونية الحجر.

٢٤. الشيشة يعني فيروز

زي ما الشتا بيفكرك بفيروز فالشيشة وام كلثوم وفنجان القهوة او الشيشة وفيروز وفنجان الشاي هما حالة فنية شبيهة بالحلم, لو لقيت البنت في الحالة دي سيبها والنبي, بلاش نكد.

٢٥. الشيشة مش بتاعة المعلمات

البنت ممكن تكون متعلمة ومصروف عليها وغنية وبتشتغل في كاريير لطيف وبتحب الشيشة, متطبقش الطبقية في الشيشة والنبي.

٢٦. اللبان صديقك الصدوق

الحقيقة ان حوالي 85% من البنات مش بيقولوا انهم بيشيشوا, وده معناه ان لازم تحصل اجراءات وقائية قبل الشيشة, هتلاقي لبان في البق بسرعة ورشتين “بودي سبلاش” قبل ما يروحوا, ده امر طبيعي لا يستدعي توقفك معاه اطلاقا.

٢٧. لو الدنيا بتمطر…

لو الدنيا بتمطر البنت اللي بتشيش هتقعد بره, دخان الشيشة في الاماكن المغلقة مش لطيف وهو عارفة, البس لبس تقيل واعتبر نفسك في فيلم اجنبي رومانسي وعدي الليلة.