كتير بيعتبروا الكلمات هي أهم حاجة في الأغنية، وكتير بيشوفوا إن مستوى الأغاني في مصر قل بسبب إن الكلمات بقت مكررة ومفيهاش جديد.. بس ساعات كمان الكلمات بتبقى مربكة، وساعات بيبقى من الصعب إستنتاج أي رسالة من الأغنية، بالذات لما تكون الأغنية بتسأل اسئلة من غير ما تجاوب عليها..
١. مين اللي ميحبش فاطمة؟
البداية مع التراث، الأغنية اللي بتكرر نفس السؤال بإستمرار: مين اللي ميحبش فاطمة؟ ومع إن كلمات الأغنية بتأكد إن “فاطمة طاقة نور وحنان” إلا إننا لسه مش عارفين مين اللي ميحبش فاطمة.
٢. مين في الحياة دي متولدش بريء؟
على غرار الأغنية السابقة اللي بتتساءل عن أشخاص، على ما يبدو بتحاول الأغنية دي توصيل فكرة إن كل الناس بريئة والزمن بيغيّرها.. بس فعلاً، مين في الحياة دي متولدش بريء؟ غشان مطر مثلاً؟
٣. ليه يا دنيا الواحد؟
لسه مع خالد عجاج، المرة دي بينضمله “الكينج” محمد منير، حيث الدويتو الشهير والذي تتكوّن نصف كلماته تقريباً اسئلة وجودية هامة مثل: “ليه يا دنيا الواحد بيقرّب من ناس بايعاه؟ ليه يا دنيا الواحد يتغرّب عن ناس شارياه؟”
٤. وهي عاملة أيه دلوقت؟
وطالما ذكرنا “الكينج” يبقى لازم نذكر “الهضبة”، يتسائل عمرو دياب في أغنيته عن هي عاملة أيه دلوقت ومين هوّن عليها الوقت، وقد تكفّل أهل الإنترنت بالإجابة عن هذا السؤال حيث أكدوا إن هي بتاكل دلوقت والأكل هو اللي هوّن عليها الوقت.. أما عن سؤال “أجيلها ولا مش دلوقت؟” فقد نصحوه بأنه ييجي بس لما يجيب الأكل الأول.
٥. يا ترى يا حبيبي
الفائز بجائزة الأكثر إلحاحاً بدون منازع، إمبراطور الأسئلة، بهاء سلطان.. حيث نجح في أغنية واحدة إنه يأكتر من 15 سؤال بالتمام والكمال!
