فيه حاجات غريبة كده تقريباً كلنا بنعملها على طول. ملهاش لازمة. ملهاش اي تفسير منطقي. و للاسف بتخلي حياتنا اصعب و بنشتكي منها و برده مبنبطلهاش . معرفش احنا ازاي ناس مملين كده! دول اكتر عادات فصيلة بنعملها:
١. تسمع نفس الاغنية
اغنية جديدة نزلت. كلمات مختلفة و مزيكا تتجنن. عجباك فحت فتفضل تسمع و تعيد و تزيد فيها. و ده مش هيوصلك غير لحاجة واحدة بس! انك تكره الاغنية و الي بيغنيها و اليوم الي فكرت تسمع فيه الاغنية! ليه كفاية تسمع الاغنية 20 30 مرة ورا بعض بس مش لدرجة 100 يعني
٢. سكرول اب اند اوفر اند اوفر
يعني الفيس بوك يبقى ممل جداً، مفيش اي حاجة جديدة. و انت تفضل تتطلع فوق و تنزل تحت و تتطلع فوق تاني.. و ممكن تفضل ساعات تعمل كده و متحسش بنفسك! تخيل كمية الحاجات المفيدة الي كان ممكن تعملها في الوقت الي ضاع على فاضي ده؟
٣. اون لاين
بعد ما ضيعت اليوم كله على النت، و ما انجزتش اي حاجة من الي كنت مخطط تعملها.. و الوقت اتأخر و خلاص قفلت اللاب توب و في السرير و خلاص هتنام.. تقوم بحركة لاارادية جايب الموبيل و فاتح الفيسبوك الي انت لسه قافله من اقل من خمس دقايق. و لو حبيت تحس انك بتشوف حاجة جديدة بتفتح انستجرام. شوية و تلاقي الفجر و بكده تكون لا عملت حاجة مفيدة لا ليل و لا نهار
٤. Snooze
اكتر اوبشن غير عملي! لو مصحتش من اول مرة الموبايل رن فيها يبقى مش هتصحى خالص! ملهاش اي لزمة تعمل سنوز كل خمس دقايق. انا عارفة اد ايه الخمس دقايق نوم بيفرقوا بس بيخلوني عايزة انام اكتر. يا تصحى يا متصحاش .. و غالباً ما بتصحاش..
٥. طقوس المذاكرة
الامتحانات خلاص قربت و انت عايز تذاكر. بس ينفع تقعد و تفتح الكتاب كده على طول؟ لا طبعاً! لازم تحضر جو مناسب يساعد على المذاكرة. ترتب الاوضة، تحضر الكتب، تاخد شور، تاكل، و بعدين تعمل قهوة عشان تفوق و تركز و بعدين هتلاقي الوقت جري و انت تعبت و تكسل تذاكر و تنام.. الي عايز يذاكر بيذاكر على فكرة
٦. ليه تزنق نفسك
معرفش ليه لو وراك حاجة بتستني اخر دقيقة لحد ما تعملها! لو وراك امتحان او شغل بتستنى لاخر دقيقة عشان تخلص الي وراك، لو هتسافر بتحضر الشنطة قبلها بخمس دقايق، عندك مشوار و ممكن يكون بعدين و تنزل في قبلها بمفيش و تتأخر. ليه بنعمل كده.. ليه؟!
٧. جعان و مكسل
معتقدتش فيه اتنين ممكن يختلفوا على ان الجوع في انصاص الليالي اسوء حاجة ممكن تحصل للبني ادم.. و الاسوأ انك تكسل تقوم تعمل لنفسك اكل و تفضل انك تفضل جعان! مش هنتعلم نعتمد على نفسنا بقى و لا ايه؟
٨. افتح الثلاجة و اقفلها
الجوع بليل ممكن يوصلك انك تقوم تفتح التلاجة تبص على الي جواه بس و تقفلها تاني. او ممكن تعمل كده لمجرد انك زهقان فقررت تتمشى في الشقة شوية و بالمرة تشوف التلاجة فيها ايه. على فكرة فتح و قفل التلاجة كتير بيبوظها.
٩. باي .. سلام .. مع الف سلامة.. في رعاية الله
افصل جزء في الزيارات العائلية لما يقوموا يمشوا.. ياااااه على فصلان! دول يتحايلوا على دول انهم يقعدوا شوية (و هما اصلاً بيتابوا و عايزين يناموا) و دول يحلفوا انهم اتأخروا و لازم يمشوا.. طب كوباية شاي.. طب مش عارفة ايه.. فيها سنة لحد ما يقوموا و يتحركوا للباب و يقفوا قدام الاسانسير شوية كمان و عادي مش بعيد يدخلوا يقعدوا تاني.
