رب قوم قالوا لقوم, متيجي نلعب بولة ترنيب….
دي حقيقة واقعة, بالنسبة للشاب المصري منذ نعومة اظافره, الاستيمشن والترنيب والجاك واخواتهم هي العاب تتحول لجزء من حياتهم الى نهاية العمر يا ولدي.
قعدة لعب الورق ايا كان نوعه قعدة مختلفة ومسلية سواء بتلعب او واخد دور المشاهد.
القعدة بطبعها يا في بيت يا في مكان عام الناس متعودة عليه, لان طبيعة القعدة بتتطلب نوع من الراحة النفسية عشان نركز.
قعدة لعب الورق عند الرجالة قعدة صامتة, الكل مركز في الهاند اللي في ايده والهزار بيشتغل اول ما الدور يخلص ويتبعه احيانا الانتقال مباشرة الى استوديو التحليل الفني للدور وقد تنتهي الفقرة بخناقة حول مين في الدور اللي “قفص” لا مؤاخذة.
دول الرجالة, البنات موضوع مختلف اطلاقا!
البنات بتلعب الترنيب او الاستيمشن بطريقتين مختلفتين, الاولى يطلق عليها طريقة “أدينا بنتسلى” ودي للاسف بتكون كلها اخطاء ولعب هامشي ضعيف لا يمت لالعاب الورق بصلة.
وعندك البرنسات بقى اللي هما البنات اللي واخدة الموضوع جد وبيلعبوا بجد جدا!
القعدة عادة في بيت واحدة من الصديقات او على أسوء الفروض في كافيه متعودين يقعودوا فيه. القعدة بتبقى عادة متفق عليها ومتفق على ميعادها قبلها بفترة وعادة ما تتكرر في نفس الوقت من الاسبوع او الشهر.
القواعد متفق عليها من قبل لأن للأسف اللعبة لمت وبقت القواعد خلافية متغيرة عند البعض.
دي قواعد اللعبة نفسها وفقا للاتحاد الدولي للترنيب (اه موجود وممكن تلاقيه على الانترنت بسهولة ومقره الرئيسي في لبنان).
لكن قواعد القعدة عند البنات تختلف شوية.
١. الهزار والرغي والنميمة أمر مستحب ومطلوب
زي اي ست مصرية زنانة اصيلة, البنت المصرية بطبعها تعشق المالتي تاسكنج يعني ممكن تلعب وتشرب حاجة وتشيش وترغي وتنم وتبقى مركزة في كله, لا تخرج قبل ان تقول سبحان الله.
٢. لو خسرت اللعبة بتقلب وشها
دي حقيقة, احنا فاشلين في تقبل الخسارة وفي نفس الوقت معندناش استعداد نتخانق. وده بيؤدي للبوز المتين مع لعب الدور الجاي بقفش جدا. ولو البولة خلصت, هنطلب نلعب بولة جديدة نحسن المجموع فيها.
٣. بتقطعي عليا ليه؟
دي الشخطة الوحيدة اللي ممكن تسمعها في لعب الترنيب بين البنات (لغير لاعبي الترنيب: القطوع هو اللون المتفق عليه بين الاربعة ان يطغي على اي ورق على الارض, لمزيد من المعلومات ارجع للأتحاد الدولي للترنيب)
٤. الزغرة مسموح بيها تماما
الترنيب لعبة فرق, يعني كل اثنين قدام بعض فريق بيلعب لصالح واحد, الزغرة بين البنتين اللي في فريق واحد طبيعية وعادة بتكون لما واحدة منهم تلعب لعبة غلط او كوسيلة تحذير للطرف الثاني والكارت بينزل (اللي هو ركزي وحياة الوالدة عشان الهاند ده مهم)
٥. ورقك حلو يعني
دي احد الاختلافات الجوهرية بين البنات والولاد في لعب الورق, بما انه غير مسموح بكشف الورق وفي نفس الوقت الخيار جماعي والقرار بين اثنين بيحاولوا يستقوا اي معلومة عن الورق بتاع شريكهم واسهل حاجة هي الضحك والهزار التي يتبعها سؤال “اخبار ورقك ايه” او “ورقك حلو يعني” قبل ما يطلبوا عدد لمات مرعب مش هيقدروا عليه. ده مسموح في حدود طبعا ولو الموضوع خرج عن حده ووصل لمرحلة الاستهبال, الفريق التاني من البنات الواعية قادر على التدخل تماما.
٦. حبيبي اخلص الدور واكلمك
دي جملة بتتكرر كتير بين البنات المرتبطة اللي بتلعب ترنيب, حتى لو مصاحبة جورج كلووني, البولة تأتي اولا ولا وقت للحب.
٧. المالتي تاسكنج لا يستمرطويلا
يعني هيكون فيه دور البنت بتهنج فيه وتلعب لعبة غلط او تطلب طلب مش قده او حتى تقول “لا مش لاعبة يالا نوزع تاني”. الطلعة دي مسموح بيها مرة في البولة والبولة 13 او 18 دور على حسب الاتفاق المسبق.
٨. غير مسموح بالاستوديو التحليلي
من منطلق اللي حصل حصل مش هتفرق.
٩. دايما فيه واحدة مبتعرفش توزع
وعادة ما يكون الورق بيقع من ايدها او بتكون غير قادرة على العد وعادة ما تتطوع واحدة تانية للتوزيع بالنيابة عنها عن طيب خاطر.
١٠. مفيش أكل
ودي حركة حريمي جدا والغرض منها بكل بساطة ان الكوتشينة ميجيش عليها اي بقعة ليس الا.
سيب البنت لو بتحب الترنيب تلعبه, ولو هي مبتحبش الترنيب علمهولها, ولو انتوا الاثنين بتلعبوه متلعبوش سوا ولو انتوا الاثنين مش بتلعبوه, براحتكوا!
