أي نعم, كل الناس بتاخد سيلفي بس السيلفي مش نوع تصوير لا مؤاخذة , ده اسلوب حياة.
الحقيقة انه تقتح فيسبوك او تويتر او حتى الحنفية هتلاقي نوع من انواع السيلفيز في وشك من سيلفي الاوسكار الشهير الى “بيلفي” الاستاذة كيم كارداشيان التي تستعرض فيه قوة الديريير او خلفيتها ولا مؤاخذة برضه.
طيب, السيلفي صورة بناخدها لوحدنا او مع اصحابنا بمناسبة او غير مناسبة لكن الحقيقة ان في عشر قواعد اخلاقية اجتماعية اساسية للسيلفي يجب اتباعها لو بتفكر تاخد سيلفي قوي مؤثر يجيب لايكات على الفيسبوك.
١. سيلفي الحمام ده هزار يا جدعان
وانتي طالعة من الحمام وكل خد عليه خوخة ده موضوع شخصي محدش عايز يعرفه والمصحف
٢. سيلفي الجيم…عاش يا وحش!
طيب, انت ربنا كرمك واشتركت في صالة الحديد وكده, انا مالي بصورة الباي والتراي وانت “بتفلكسهم” وجسمك مليان عرق وكده, ده شيء شخصي جدا وهيقلل نسبة المعجبات اللي انت بتتمرن عشان تجيبهم اساسا.
٣. الفرح فرحنا
السيلفي في الافراح شيء متبع الناس اتعودت عليه, خاصة لو انت فرحان بالعريس والعروسة واصحابك وكده بس حط نفسك مكان اصحابك اللي هيفتحوا انستاجرام او فيسبوك يعرفوا تفاصيل الفرح كلها من صور السيلفي بتاعتك. على فكرة, السيلفي مع البوفيه مكروه, كل وانت ساكت.
٤. لكل مقام مقال
السيلفي في الجنازة لا يصح. السيلفي في المستشفى لا يصح. السيلفي الغصب مع فنان او لاعب كورة من غير استئذانه دي قلة ذوق.
٥. انت مش اقل من اوباما
اوباما خسر كتير لما اتصور مع رئيسة وزراء الدانمارك في جنازة نيلسون مانديلا لسببين, السبب الاول واضح (راجع القاعدة السابقة) والسبب الثاني انه ساب المدام وراح اتصور سيلفي مع مزة. اظن الموضوع واضح, لو اوباما نام على الكنبة يومها تخيل انت هيحصلك ايه لو عملتها, متنساش ان السيلفي بطبعه بيحتاجك لا مؤاخذة “تلزق” في اللي بتتصور معاه, اترضاها للمدام؟
٦. متتصورش وانت في السرير
سكارليت جوهانسون بتصحى منفخة ومنكوشة في السرير, تخيلي شكلك انتي شخصيا وانتي لسه صاحية؟ العرسان هتهرب واصحابك هيفقعوا عينيهم.
٧. البطة اشتكت يا شابة
الداك فيس او وش البطة اللي البنات بتعمله في السيلفي راحت عليه خلاص, عمر شكلك ما هيكون جذاب ولا مشوق والعرسان مش هتقف على الباب. ليا صديق بيقول على الداك فيس بتاع البنات “بفتكر عربيتي بعد الاكصدام ما باظ ودي ذكرى سيئة”, عايزة تفكريه بعربيته بعد الحادثة, جو اهيد!
٨. سيلفي البوكسر
اكيد صورتك بالبوكسر وانت منكوش سيكسي, ده لو انت براد بيت. انت مش براد بيت ومش محتاجة اشوف صورتك بالبتاع. ثم ان اغلب الناس في مجال الموارد البشرية دلوقتي بتدور على المرشحين على شبكات التواصل الاجتماعي, تخيل مديرة الموارد البشرية في شركة احلامك وهي بتفتح صورتك بالبتاع في حمام البيت وانت لسه صاحي من النوم. احلى انطباع في الدنيا, مبروك الوظيفة الجديدة يا باشا!
٩. عالم الانترنت اللزج
القاعدة الاولى في الانترنت هي انه اول ما تدوس “سيند” أو “بوست” مبقتش ملكيتك خلاص. بقت في الفضاء الانترنتي الوسيع ومن سابع المستحيلات تمسحها حتى لو شيلتها من التليفون او من حسابك على انستاجرام او فيسبوك او تويتر. اي هاكر بتلاتة جنيه هيجيبها. فكر كويس قبل ما ترفع الصورة.
١٠. خف تعوم
فكر في النيوزفيد اللي اتزحم من صورك وفكر ان بعض الناس ممكن تفتكر انك فاضي ومش وراك حاجة ولو ده ما أثرش فيك, افتكر ان مديرك في الشغل عندك على الفيسبوك. عايز اجازة؟
