قرر توكيل قطونيل إنه يعلن عن منتجاته في التليفزيون من بتاع تَلَت سنين، و ده حقه الطبيعي يعني.. و برضه من حق المشاهد “الطبيعي” إن يكون ليه رد فعل “مناسب” للإعلانات “غير المناسبة” اللي تطورت على مدى السنين.
١. إرفع أم البنطالون
أول إعلان يظهر ع الشاشة كان في 2011.. و كان عبارة عن ولاد مدلدلة بنطالوناتها بحيث إن التركيز الشامل الدائم يكون ع البوكسر.
٢. أسامة منير
تاني إعلان كان في 2012.. و كان عبارة عن تعليق صوتي نسائي بيشتكي ع التليفون مع برنامج أنا و النجوم و هواك، و اللي ظاهر ع الشاشة غيارات منشورة على حبل الغسيل و المفروض إن دول بيشرحوا القصص اللي بتقولها الست اللي ع التليفون. بصراحة أنا بحب الإعلان ده لإبداعه.. بغض النظر عن أي حاجة تانية
٣. يا عيني يا ليلي على قطونيلي
2013، و هنا يظهر شعار مساند للقطن بيتكلم مصري.
*لاحظ التورتة اللي على شكل بوكسر و فانلة في الدقيقة 0:25 ..
٤. مراتي بتغير عليَّ من اقرب حاجة ليَّ
2014، سلسلة الإعلان ده بدأ بكذا teaser، و هو كان عبارة عن ست بتزغزغ أو بمعنى أدق بتتحرش بهاني رمزي، فيروح هاني رمزي منشكحًا قايل: مراتي بتغير عليَّ من اقرب حاجة ليَّ.
المهم إن جمعية المؤلفين و الملحنين بعتوا تحذير للشركة القائمة ع الإعلان و للقنوات اللي بتذيعه عشان في الإعلان الأخير (اللي بعد الـteaser) استغلوا لحن عبد الوهاب في أغنية “أنا واد خطير.. بلبس قطونيل” من غير ما يدفعوا المستحقات المادية لحقوق الملكية الفكرية. فبالتالي اتوقف.
و ده كان آخر إعلان و ربنا “يستر” على بتاع 2015.
