فيه ناس كبرنا معاها، و فجأة اختفت. و فيه ناس من يوم ما وعينا ع الدنيا و هي كبيرة فكبرتنا معاها، و لما كبرنا انسحبوا.. لأسباب مش مفهومة، شوية منطقية و شوية مش منطقية خالص. في كل الأحوال الناس دي أثرت فينا تأثير مش عادي، و لو كنا كبرنا من غيرهم مين عالم كنا هانبقى زي ماحنا ولّا ناقصين حتة ولّا زايدين حتة.
١. باسم يوسف
بدأ من الألف. من B+ ع الـYouTube لبرنامج البرنامج على ON TV، و من هناك لمسرح راديو مع قناة CBC. و دخل في خناقات مع القناة لأكتر من مرة و برنامجه اتشوِّش عليه لبرضه أكتر من مرة.. ساب القناة خالص و اتجه لـMBC MASR و بعد كدا برضه حصل مشاكل من قبل ما نوصل للحلقة الرابعة. رحلة كفاح ما عاشهاش مذيع تلفزيوني قبل كدا في مصر.
مكسب الثورة.. عشنا مع باسم 3 فترات، فترة الـ18 يوم، و بعدين فترة المجلس العسكري، و بعدين فترة الإخوان، و بعد كدا المرحلة الانتقالية و عدلي منصور.. و بعدين أعلن إنه خلاص، نفسه كان طويل بس جاب أخره. باسم الفترات دي كلها لا غيّر نبرته، ولا غيّر مبادئه و مواقفه – و دي حاجة من الواضح إنها كانت صعبة جدًا في الفترات الأخيرة.
تكاثرت التعليقات عن ابتعاده عن الساحة و لكن الواضح ان كان في تهديد لحياته الشخصية و العائلية من النظام الحاكم. بس ماحدّش يقدر ينكر إنه فعلًا الحاجة الوحيدة اللي كانت بتصبرنا، و إنه فعلًا من أجمل ما جابت الثورة.
٢. جورج عزمي
عرف نفسه ع الجمهور من خلال ستاند أب كوميدي كان بيعرضه في ساقية الصاوي من بتاع 4 سنين. و شوية شوية ابتدت حلقاته تتتذاع على قناة موجة كوميدي. مواضيعه كانت بتسخر من النظام التعليمي، العيشة كطفل مصري في التمانينات، سلوكات مجتمعية…إلخ. قرر يختفي عشان ماكانش عايز تبقى دي مهنته و الموضوع بدأ كهواية و نهاه كهواية، و هو دلوقتي بيشتغل في مجال الإعلانات.
٣. سيمون
ظهرت سيمون في التمانينات. اشتهرت بأغنية “من نظرة و ابتسامة”، قالت إنها من أول من عرّف التلفزيون المصري ع الفيديوكليب بأغنية “تاكسي”. نوع أغانيها الشبابية الخفيفة رجع تاني دلوقتي، يسرى الهواري ماشية على نفس وتَر سيمون الموسيقي، كلام بسيط على موسيقى هادية بيعبر عن روتين الحياة الشبابية.
٤. Bad Apple band
روك باند ظهر في 2007، جُم عند 2009 و وقفوا. اتشهروا قوي كموسيقى underground، كانوا بيلعبوا في الساقية و لوهلة كنت تحس إنهم هايحققوا نجاح رهيب و هايبقوا حاجة كبيرة قوي في المستقبل. ماتعرفش إيه اللي حصل فجأة. أغلب أغانيهم كانت بالإنجليزي، بس كانوا برضه بيغنوا بالعربي.
٥. ريم ماجد
أوضحت ريم ماجد أن “القناة ترى أن هناك أولويات للمرحلة مثل الأمن القومى والمصلحة الوطنية، وأنا أولوياتي هي الحرية والحصول على العيش والكرامة ومحاربة الإرهاب، فالمفاهيم المرتبطة بهيبة الدولة ترتبط عندي ارتباطا وثيقا بأمن المواطن وحريته وكرامته.” و عشان كدا قررت تختفي من الساحة.
