أغاني كنا بنغنيها زمان في المدرسة و في العيد مع ولاد الجيران و قرايبنا، و ولا حاسين ان الكلام ده مش مفهوم ولا ليه معنى ولا أي حاجة.. ولا حتى أهالينا كانوا بيحاولوا يفهموا احنا بنقول إيه.
١. كيلو بامية
كيلو بامية مؤخرًا اتضح انها في الأصل “Que le Premier” و اللي هي معناها “مين هايبدأ؟” بالفرنساوي. التكملة بقى من تأليف المواطن المصري الأصيل:
“القطة العامية
سرقت قميصي
الإنجليزي
عسكر فوق، عسكر تحت
إخص عليك يا بتاع الكحك.”
٢. اني ميني متا
اقطع دراعي لو الأغنية دي مالهاش أصل إيطالي مثلا.
“إني ميني متا
يا سمارة ستة (الجملة العربي الوحيدة، و هم غالبا هنا اصدهم استمارة ستة، يعني العيل عايز يقدم على استقالة.)
كرومبو لتة كرومبو لتة
أني ميني متة
يا سمارة ستة.”
٣. حادي بادي كرنب زبادي
حادي بادي كرنب زبادي.. طيب.. شالوا و حطوا كله علي دي، إيه اللي اتشال و اتحط؟ مش مهم. يا كتكوت روح السوق، عادي، هات البيضة من الصندوق.. ماشي.. أوعى تاكلها تطق تموت.. ليه يطق و يموت؟ هل عشان الكتكوت هياكل كائن مماثل ليه؟ هيجيله حالة زي جنون البقر يعني؟ ولا عشان البيضة بايظة.. طيب لو البيضة بايظة هيجيبها من الصندوق ليه؟ حد يرد عليا!
٤. هايعيط هايموت هيقلد الكتكوت
الكتكوت تاني أهو.. مش عارفة إيه علاقة البكى و الموت بالكتكوت.. و إيه الغلاسة دي أصلا؟!
٥. أنا سندباد
أنا سندباد، أصلي من بغداد، أختي ياسمينا عروسة المدينة جابت لي قميصين فيهم زرارين، عمي علي بابا زعيم العصابة و اخويا علاء الدين من فلسطين.. الكلام حلو و موزون، شخصيات من أساطير و حكايات، ندخل ع الجزء التاني: فلسطين بلدنا و اليهود كلابنا دقوا على بابنا زي الشحاتين.. دخلنا في السياسة شمال جامد! بعد كدا فيه: شي شي يا بتاع البلالين، مش عارفة إيه اللي جاب بتاع البلالين في الصراع العربي الإسرائيلي، و مش عارفة ليه بنقول له شي شي برضه.. بس بعد كدا بنقول له: اديني بلونة اديها لأبلة نورة اللي بتلبس طرحة بني.. ولا حول و لا قوة إلا بالله *بضرب كف على كف*
طفولة متشردة و الحمد لله.
