من المؤكد اذا كان فيه فئة في موسوعة جينيس عن اكتر جنسية في العالم بتقول كلام لا تعنيه.. فالمصريين هياخدوها عن جدارة! اعتقد ممكن نوفر على نفسنا كتير اوي لو كل واحد بقى صريح مع نفسه و مع الناس الي حواليه و بطل يقول كلام ملوش لزمة. دول اكتر جمل المصريين بيقولوها و غالباً مابيبقاش قصدهم معناه:
١. خلي
الجملة الاكثر شهرة في مصر! “خليها علينا” “خلي خالص”.. مش عارف ايه! ليه بتقول كده و انت عارف ان طالما الموضوع فيه فلوس مش هتسبلي جنيه.. ليه تخليني اتحايل عليك عشان ادفع و اخد حاجتي و امشي! انا ممكن اعدي ده لو انا في كشك او تاكسي .. لكن في محل كبير ليه؟! عاجباك وقفتي قدامك و تعطيل الطابور الي ورايا. الموضوع بقى بيعصبني و بيضيعلي وقت كتير اوي فالمرة الجاية لما ادخل ستار باكس و الشاب الكيوت الي بيشتغل هناك بعد ما يقنعني تقريباً اني اجيب المنيو بتاعتهم كلها و يكتبلي اسمي على القهوة و يقولي “خلي” هبتسمله و اقوله “مرسي” و امشي.
٢. تعالى اشرب شاي
و غالباً بتتقال كده “تعا اشب شاي” لواحد معدي مثلاً من قدام قهوة. انا متهيألي و الله اعلم ان لو الشخص ده فعلاً قعد يشرب كوباية الشاي بتاعتك الي انت لسه عازم عليه بيها هتبقى مضايق و مش مسامح فيها من جواك
٣. لازم تيجوا عندنا
“لازم تتطلعوا عندنا” “ميصحش لازم تتغدوا معانا انهارده” “طب تاخدوا الشاي” الجمل ديه بتتقال في مواقف كتير اوي و في معظم الاحيان بتبقى عزومة مركبية. محدش بيبقى عايز حد يجيله دلوقتي لان اولاً اكيد البيت عندك مش مترتب و ثانياً اكيد معندكوش اكل كفاية و مش هيبقى عندك استعداد تعمل اكل مخصوص! فخلي بالك من كلامك قبل ما تتدبس
٤. البيت بيتك
اعتقد انك اكيد هتغير رأيك لو الي جاي يزورك معاه اطفال، و لو الاطفال ديه من النوعية الرخمة الي بتنتشر في المكان و تفتح الدولايب و تفتش في الحاجة.. انت محتاج تبطل تقول الجملة ديه.
٥. البيت نور
ممكن تقولي الجملة ديه لو النور كان مقطوع عندكوا و اول لما جيت جيه معايا.. لكن غير كده بيت ايه الي نور لما جيت؟! بتوسع منكو اوي ديه
