الظروف اسعفتني رمضان اللي فات وكانت صحتي على قدها فقعدت في البيت قدام التلفزيون وهالني ما رأيته. أه والله.
المسلسلات المصرية بصفة عامة معروفة برتابتها وتشابهها ودي شيء اتعودنا عليه وعلى الكليشيهات المكررة اللي فيها لكن السنة دي والسنة اللي قبلها لفت نظري السرقة البجحة لا مؤاخذة واللي بتبان بسبب فقر السرقة, حتى في السرقة مش عارفين نسرق. تعرف معي على اشهر حالات السرقة المصرية لمسلسلات اجنبية في الكام موسم اللي فات.
١. السيدة الاولى
بصفتي محبة للسيد كيفين سبيسي والسيدة كيري واشنطن كان من السهل اني اشوف الكثير من “الاقتباس” بين مسلسل السيدة والاولى ومسلسلي House of Cards و Scandal . سيبك من الخلطة الغير منطقية واللي مش لايقة اساسا على الساحة السياسية المصرية (من منطلق اننا منزلناش تسعين مرة ننتخب في خلال 3 سنين) لكن من اول لبس غادة عبد الرازق لأخطاء في فهم السياسة المصرية تتأكد تماما ان خلطة المسلسلين دول مع حتة من مسلسل مكسيكي بنفس الاسم مع شينيون غادة عبد الرازق عاملة شغل مش عاطفي خالص.
٢. سرايا عابدين
اول حلقة طلعت منها بتاع 5 اخطاء تاريخية وصاحباتي من ربات البيوت اكدولي ان فيه حتت مسروقة بالظبط من حريم السلطان. على فكرة الخديوي اسماعيل مكانش عنده حريم وكان بيحكم مصر الحديثة اللي هو يعتبر مؤسسها ومكانش مقضيها مع النسوان في السراير طول اليوم, طب خلوه يعدي على مكتبه مرة على سبيل التغيير! سيبك من ان قصي خولي واد مز زي العسل, دي تفاصيل صغيرة!
٣. دهشة
حتى الملك لير مكانش ممل كده! وفكرة المسرحية اتهرست مليون مرة قبل كده. الرحمة حلوة!
٤. هبة رجل الغراب
الله يمسيكوا بالخير با بتوع Ugly Betty , مكانش مكتوب لكوا الاهانة والبهدلة دي والمصحف!
٥. الصياد
خلطة مستفزة من مسلسل The Mentalist و فيلم The Double ومعندناش ظباط شرطة ومرتزقة سكس اوي كده ولابسين نضارات شمس ومليانين غموض طول المسلسل كده وعلى فكرة ريتشارد جير خط أحمر!
٦. الباب في الباب
عايز تسرق فكرة Everybody Loves Raymond مش إشكال, مش هزعل بس والنبي حتى حاول تغير في تصميم البيت او الحوار او اي حاجة, لاني لو عايزة اشوف اسرة من نيويورك, اتفرج على النسخة المصرية ليه؟
٧. احلى ايام
ممكن اتوقف هنا واخد نفس عميق وافتكر اني مينفعش اشتم عشان مشاعرك بس &#@!$@!$ يعني الصراحة, انت مش بس سارق How I met Your Mother بس سارقها بفجاجة وبتقل دم غير مسبوق, ثم ان Barney كان امور, مينفعش يبقى شكله وحش ودمه تقيل في النسخة المصرية, وتاني, الشباب المصريين مش عايشيين في نيويورك ومشاكلهم مش مشاكل شباب نيويورك , اه والمصحف.
٨. احمد اتجوز منى
أه يا قلبي, انتوا مضيتوا على المسلسل ده بقلب جامد ازاي؟ لا حقيقي؟ هو على العموم خليط ما بين Mad About you و Friends و Will and Grace ( من غير الشذوذ). هي حاجة كده شبه لية الخروف وبتدفعك لقطع شرايينك بسرعة.
مش هتكلم عن الافلام لاني ممكن اقعد هنا لحد مصر ماتكسب كاس العالم, ومصر مش هتكسب كاس العالم فانا هتكلم كتير. وعلى رأي شعبان عبد الرحيم: بس خلاص!
من امريكا لبريطانيا وتركيا وحتى المكسيك (المكسيك يا كفرة), انا خايفة افتح التلفزيون رمضان اللي جاي الاقينا سارقين من كوريا الجنوبية وبيرو, حسبي الله ونعم الوكيل!
