و نرجع تاني نقول يا فرعون مين فرعنك مالاقتش خد يلمني.. العيب مش ع الناس دي، العيب ع اللي ماشي وراهم من غير ما يفكر و لو لشوية صغيرين. الناس دي يا وراها مؤامرة، يا عندهم موهبة خارقة. ما هو شيء مش منطقي خالص اللي بيحصل ده!
١. آيه مصطفى
سيظل سبب شهرتها لغز زي ال Kardashians بالظبط. قررت تنضم للـ Youtube vloggers مؤخرًا، و نجحت نجاح غريب. برغم إن ليها برضه ناس بتكرهها كره العما، عندها شعبية كبيرة جدًا جدًا ع الفيسبوك. لو عمرك ماتفرجت على أي حاجة من أعمالها المهببة، ادخل شوف الفيديو بتاع الفسيخ مثلًا و هاتعرف ليه آية لازم تختفي. و بسرعة.
٢. مرتضى منصور
خوفًا على عيال كتيرة قوي مستقبلها هايضيع، الراجل ده لازم يختفي فعلًا. و خوفًا برضه على مستقبل نادي الزمالك، و برستيج المحاميين، و ناس نضيفة كتير، و دماغنا بصراحة. لازم مرتضى منصور يعتزل حياتيًا بقى.
٣. سامح ابو عرايس
في الواقع، هو شخصية مثيرة للإهتمام جدًا. و ساعات كتير باستمتع بقراءة تحليلاته الـtwisted. بس مؤخرًا الموضوع بدأ يزيد عن حده، و قلب ازدراء أديان و بتاع، و مبهدل نظريات المؤامرة معاه ليل و نهار. دول يا عيني أصحاب نظريات المؤامرة دلوقتي بقوا يتشبهوا بسامح، الموضوع بقى مؤلم جدًا يا جماعة.
٤. مصطفى بكري
راجل نشيط جدًا في التخصص بتاعه. متعدد الوشوش، لكن الإسلوب واحد.
وِش عامل فيها معارض في البرلمان أيام مبارك. و وِش تاني يطلع ع المحور يدافع بحرقة عن مبارك أيام الإعتصام في أوائل فبراير، قال إن المطالب اتحققت و الراجل عداه العيب و غير الحكومة و أي كلام في إسقاط النظام بأكمله تعني الدخول في فوضى و كدا. و بعد التنحي وِش تالت خالص ظهر مع مجدي الجلاد يقول لك إنه نزل مسيرة يهتف يسقط يسقط حسني مبارك. و ماتعدّش بقى الوشوش اللي ظهرت في أول إنتخابات الرئاسية بعد الثورة.. كان مرة يقف مع حازم أبو إسماعيل، و شوية و يقف مع عمر سليمان.
عمومًا خلاص هو الراجل اتهرش، و من كله، فلول بقى ثوار، إخوان.. الكل متفق على إن الراجل ده نشيط جدًا في التخصص بتاعه. و إن كان فيه حاجة ممكن في يوم من الأيام توحد المصريين هو الموقف اللي واخدينه من درش، و عشان كدا هو لازم يخزي الشيطان و يقعد في بيتهم.
٥. ياسر البرهامي
أحد قيادات الدعوة السلفية، آخر فتوى صرح بيها ع التلفزيون هو عدم جواز تعليق صور ميكي و بطوط ع الحيطة في أوضة الأولاد.
اكتب “فتاوى برهامي” في Google هتلاقي إن معظم الصفحة فتاوي عن علاقة الراجل بالست. و بصراحة أنا مش عارفة إيه علاقتها بالدين – آه الدين مش بس بينظم علاقة العبد بالرب، بينظم علاقة الناس ببعضها كمان، بس التفاصيل الغريبة اللي في فتاوي فضيلة الشيخ ماعتقدش إنها المفروض تبقى جاية من “رجل دين” خالص! و إذ افترضنا إن حد سأله عن حاجة كدا المفروض يقول له يشوف دكتور و يفضها سيرة. الدين مش ناقص بهدلة يعني. المهم إن الراجل ده تعب ناس كتير نفسيًا، و بقينا نخاف ندوس على لينك عليها صورته و مانشيت بيبشر لفتوى جديدة. و لو ماكنتش متابع المستجدات، أكيد سمعت عن فتوى “سيب مراتك لو همَّ كتير”.. أحب اقل لك إن الفتوة دي قطعة من الجاتوه بالنسبة لباقي الـcollection.
لو قعدنا للصبح، قائمة الإغتيالات هاتبقى برضه ناقصة.. البلد دي فعلًا شايلة فوق طاقتها *حاجات* كتير محتاجة تختفي. بس أهو، مش جايز يكون تكفير ذنوب؟
