جورج أورويل، الله يرحمه و يبشبش الطوبة اللي تحت راسه، قال مرة إن الصحافة هي انك تنشر
حاجة حد تاني مش عايزها تتنشر، أي حاجة تانية تُعتبر علاقات عامة. شكل الشلة دي كلها
شغالة علاقات عامة.
و بما إن الحكومة شانّة حرب ع الصحافة الإلكترونية، تعالوا نمشي جنب الحيط و نلقي نظرة ع
الصحافة المطبوعة.
١. اليوم السابع
محترفين عناوين مالهاش علاقة بالموضوع و مانشيتات يتسع لها الأعين إندهاشًا. ده غير
الأخطاء الإملائية الهيستيرية. دول مش بس بيبيِّنوا انحيازهم، دول بيطبعوا عنصريتهم
كمان، طيب إحنا مالنا و مال كلاكيعكم مش فاهمة؟ اليوم السابع تصنف صحافة مستقلة،
بس لما يكون جوا بنتكلم عن قضية و الصفحة الأولى جايبين لي “سر عودة هالة سرحان”،
يبقى الجوْ قلب أصفر خالص.
٢. المصري اليوم
“تعتبر” من الصحافة النضيفة اللي باقية في مصر. مشكلتي الأساسية مع المصري اليوم
هي أعمدة نيوتن المصري. غير إن أراءه بتبقى هاشة و ساعات كتير بيلف و يدور و
يسوَّحني معاه، أنا مش فاهمة ليه مسمي نفسه نيوتن؟ ليه مش اسمه الطبيعي؟ حركة
لجذب القراء؟ طيب و فيه قراء بينجذبوا؟ طيب مخبي نفسه ليه؟ ده حتى أراءه محافظة جدًا
و مافيهاش قلق.. إيه الجو ده؟
٣. الوطن
أخت اليوم السابع، بس لحسن حظنا يومية مش اسبوعية. نفس العناويين المفرقعة و
! المانشتات الصارخة. و برضه تصنف بصحافة مستقلة، بقدرة قادر.
٤. الأهرام
كون إن فيه مؤسسات صحفية كاملة شغلها الأساسي هو التعبير عن الحكومة، و مش
جريدة واحدة لا دي جراااايد، و بلغات مختلفة لا يدل غير على إننا لسه محتلين بفكر
دراكوني متأصل مترسخ يا عالم هنخلص منه إمتى. ما علينا، الأهرام دونًا عن باقي جرايد
النظام، ليها تاريخ يُحترم و و يُقدَّر، بيحبوا ساعات يحشروا كلام إنشه و يشعِروا في
الوزراء قبل ما يصرحوا عن الخبر، بس ما يجراش حاجة عادي.
٥. أخبار اليوم
بعتبرها بنت الأهرام الصغيرة، نفس الكلام بس على مُبسَّط. واخدة نفس ستايل الصفحة
الأولى بتاعة اليوم السابع. عناوين و صور من غير كلام، صياعة. لو قارنّا أخبار اليوم
بالأهرام، فمعدل الأخبار أو المقالات اللي ليها علاقة مباشرة بالقارئ محدود الدخل أكتر
بكتير من الأخبار و المقالات اللي ليها علاقة بالسياسات و القرارات اللي بتتاخد في البلد.
٦. الجمهورية
عدد اليوم اللي بكتب فيها التدوينة دي، فاتحينها بمانشيت قااااد كدا هو “عودة وطن” و
صورة السيسي و هو مش واخد باله وسرحان في هموم الدنيا. احكموا انتم بقى!
