ثبت بالتجربة العملية ان الامثال الشعبية ليها مميزات وبتساعد احيانا في اتخاذ قرار حياتي من نظرة فلسفية لكن احيانا فيه امثال شعبية غير مفهومة اطلاقا. هيا بنا نمرح ونفك طلاسم الامثال الشعبية المصرية.
١. يا مستني السمنة من بطن النملة عمرك ما هتقَلي
مين؟ فين؟ ليه؟ سمنة ازاي من نملة؟ وبعدين ليه اشتري سمنة من بطن نملة؟ وليه سمنة؟ ما زيت الزيتون حلو والله.
٢. المخدة متشيلش اثنين حلوين
يعني ليه الاحباط, ما هو براد بيت امور ومتجوز انجلينا جولي والست مزة زي القمر! ولو انك احيانا هتقابل ازواج متفهمش ليه علاقتهم ببعض استمرت على وحاشة احدهما لكن المفروض نتشجع نتجوز حد حلو, خليكوا ايجابيين هي مش ناقصة عكننة.
٣. ابوك البصل و أمك التوم منين تجيك الريحة الحلوة يا مشئوم
ولو اني مش فاهمة قوي والالفاظ قارفاني لكني بشجع استخدام مزيل العرق بشدة, بشدة قوي يعني. استحمى والله النيل مش هيخلص.
٤. اللى ما يقدر على الحمارة و عليقها يخلى من طريقها
الملافظ سعد يا عب عال! هو طبعا ده, على حسب فهمي, تشجيعا للناس على الصرف في الجواز والنسب وكده بس, نعم يعني؟
٥. اللى يبص لفوق يتعب
متشجعوا بعض على الطموح, ليه نكسر مقاديف بعض يعني؟
٦. اللى يتجوز أمى أقول له يا عمى
مفيش مبدأ يعني خالص؟ خلي عندك بجنيه مبدأ والنبي!
٧. أم بربور ما بتبور
نفس نظرية “الانصاص قامت والقوالب نامت”, ليه كسر المقاديف برضه؟ واخيرا: متتجوزش واحدة مناخيرها سايبة, مش سكسي خالص!
٨. ان كنت عاوز تمص قصب مص من الوسط و إن كنت عاوز تخطب خد رفيعة الوسط
ماشية معاكي يا كيم كارداشيان! بس السؤال هو, ايه الي دخل القصب في الموضوع؟ وبعدين تمص القصب من الوسط ازاي؟
٩. البطيخة القرعة لبها كتير
معرفش اصلا دي حاجة حلوة ولا وحشة؟ ومين البطيخة في المعادلة اساسا؟!
١٠. بنت بلا أمها تلعب بكمها وولد بلا أبوه يركب المرجيحة
محدش فاهم حاجة…
١١. بوس راس مراتك فى الفرشة و لا تبوسهاش فى الجلسة
ليه؟ متدلعها في الفسحة قدام الناس؟ الببلك ديسبلاي اوف افيكشن مطلوب والله.
١٢. جوز الضراير غندور و لو كان له بربور
بربور تاني؟ فيه ايه؟
١٣. حاجة بدعناها و لا طلعنا لقيناها
عشان الشعب المصري انتربرونور بطبعه!
١٤. خدى بختك من ايد اختك
ايه السرقة دي؟ عيب بأه!
١٥. الرك مش على النون الرك على ايد الزنزن
علامة استفهام كبيرة!
١٦. قال حبني وخدلك زعبوط قال هي المحبة بالنبوت؟
اخد زعبوط ليه انا؟مش عايزه زعابيط انا!
١٧. مخدة العز شوك ريحان و مخدة الفقر ريش نعام
عرفتوا ليه احنا من دول العالم الثالث؟
١٨. مزاجى و لا أولادى
أصيل يا ابو العيال والله
١٩. مكتوب على ورق الخيار من سهر بالليل ينام بالنهار
اولا ورق الخيار اللي هو ازاي؟ ثانيا: ما هو اللي سهر بالليل لازم ينام بالنهار, يعني مينامش ولا ايه المطلوب؟
٢٠. من غسل وشه و رجليه بان الحموم عليه
على فكرة لأ! استحمى بجد متصيعش وتغسل وشك وخلاص!
٢١. هو دخول الحمام زى خروجه
اه على فكرة عادي, نفس الباب ونفس كل حاجة, بتخرج اخف وزنا شوية بس عادي يعني!
٢٢. ولاد المليحة فضيحة
يعني نتجوز ناس وحشة؟ وفضيحة ليه اصلا؟ دي حاجة حلوة ولا ايه؟ انا مش عارفني…
٢٣. يا أبو البنت ما تعوزها مسيرها لبيت جوزها
ابات عند البواب يعني؟
٢٤. يدى الأقرع كسكته و يدى المكسح بسكلته
ممكن يبدلوا مع بعض عادي طيب؟
٢٥. ادينى النهاردة صوف و خد بكرة خروف
هاري بوتر جه أهو! لا سحر ولا شعوذة!
