انا من محبي السينما. ممكن ادخل سينما كل يوم. بعتبره بيتي التاني. حفلات الساعة 10 الصبح و 1 الضهر عاملنها عشان نفكس للمحاضرات و نروحها. و من كثرة ترردي على هذا المكان، قدرت ارصد اكتر افعال بتعصبني جداً من المشاهدين
١. رايح جاي
من اول ما الفيلم يبدأ، تلاقيه ناس كده مش قاعدة على بعضها. كل شوية تقوم و تيجي. مرة بيجيبوا فشار، مرة حمام، مرة واحدة تقوم تعدل هدومها. في الدقيقة الي بيتحركوا فيها ديه انا بتشتت و بنفصل و بضايق! الفيلم لما يبدأ يا ريت محدش يتحرك كأنك بتلعب تماثيل اسكندرية.
٢. الضحك من غير سبب
الفيلم يبقى اكشن و حاجات عاملة تطير او الفيلم دراما و انا عاملة اعيط و اسمع واحد ضحكته بترن في المكان! جامد انت كده يعني؟!
٣. كل الي يعجبك
انا عارفة ان الفيلم ما بيحلاش غير و فيه في ايدك حاجة تاكلها. بس مش لازم اسمع صوت قرمشة الشيبسي و انت بتاكل. بتشتت و بنفصل و بضايق.
٤. حبوا بعض بعيد
ما هو مبقاش انا جاية لوحدي او مع صحابي البنات و بنتفرج على فيلم درامي و اتنين بيحبوا بعض قاعدين جنبنا او قدامنا و عاملين يحبوا في بعض و يضحكوا و مش مركزين في الفيلم اصلاً!! حبوا بعض براحتكوا.. بس بعيد عني و بعيد عن السينما.
٥. اطلع برا
انا مقدرة حقيقي اهمية المكالمات الي بتجيلك و خصوصاً في نص الفيلم و هو شغال بس الي مش هقدره خالص انك ترد و بصوت عالي و كمان تحكي للشخص الي بيكلمك المشهد الي بتتفرج عليه دلوقتي! لأ اطلع برا!
٦. عرفنا انك عارف
الشخص الي دايماً بيقرا الكتاب قبل ما يتفرج على الفيلم و يفضل يقارن بين الرواية و الفيلم و يحرق الفيلم لصحابه لحد ما يقوموا من جنبه و يحلفوا ما يدخلوش اي فيلم معاه بعد كده! خلاص عرفنا انك عارف.. اتفرج و انت ساكت بقى! (انا للاسف بعمل كده على طول
٧. سيلفي
ترفع الموبايل او السيلفي ستيك فجأة في نص الفيلم عشان تتصور!! عارف ان ببقى بعمل ايه ساعتها في عقلي الباطن؟! باخد الموبايل او السيلفي ستيك ديه و برميها في الحيطة! في بريك تتصوروا فيه!
