بما اننا كلنا مش سهل بالنسبة لنا تغيير العربية اول ما تبتدي اعطالها تزيد فأكيد فيه مرحلة في حياتك هيتحول فيها الميكانيكي لصديقك الصدوق وانتيم عمرك, المرحلة دي من علاماتها الاساسية ان نمرة الميكانيكي دايما في صفحة Recent Calls في تليفونك ده غير انك عارف اسم مرات الميكانيكي وعياله ومشاكلهم مع مدرس الكيميا.
ده مش معناه ان حياتك اسهل او انه الصراحة الميكانيكي دايما بيصلحلك عربيتك في صمت, لا لازم يسمعك كلام معين كل مرة تروحله
١. شكلك دورتها وطلعت على طول
امال هقرا عليها تعويذة او اغنيلها؟ عمري ما فهمت الغرض من السؤال وعمري ما فهمت الخطوات المتبعة في تدوير العربية.
٢. دي مشكلة في دورة السربنتينة فالريدياتير اتخض منك بس بسيطة
هي مشكلة انت مش فاهمها ولو جبت شركة مرسيدس او فيات من بيتها تشرحلك هتلاقيهم مش فاهمين الميكانيكي قصده ايه بس متتعبش دماغك, المهم ان العربية بتتصلح وتمشي بعدها
٣. قطعة غيار ايه سيادتك, انا هتصرف عندي هنا جوه
حتى لو هو احرف من الشركة الام بمراحل, قطعة الغيار الاصلية ليها لازمة مهمة في حياتك وهي انها معمولة مخصوص لعربيتك مش على ايد خراط مخلص شريط ترامادول حالا
٤. لا يا باشا دي عايزة شغل تعالالي الصبح بدري ان شاء الله
اديله خمس ايام وبعدين ابتدي اسأل على العربية على استحياء من غير قفش, الفرق بين الميكانيكي والتوكيل ان الميكانيكي ارخص بس شغال على توقيته الخاص اللي ملوش علاقة بالعالم البشري خالص
٥. مين اللي صلحلك البتاع ده, ده مش شغل ايدي
لازم يطلع السمكري او الكهربائي حمار قراري وانت اغبى منهم عشان وديت عربيتك عند حد تاني غيره او من غير الرجوع ليه. في الحالة دي انقذ نفسك واعتذر, متحسسوش بجرح الخيانة اكتر من كده. عامله على انه زهرة رقيقة اتجرحت من اقرب الناس ليه ومشي حالك, عشان انت محتاجه وعشان انت محتاجه يولع الكهربائي والسمكري لحد مترجع لهم تاني يبقى يحلها ربنا.
خلاصة الحوار: الميكانيكي بينصب عليك وهينصب عليك وبيعمل شغل مش منطقي وعنده مصطلحات مش طبيعية, لكن انت محتاجه, تقبل الموضوع ده كأحد حقائق الكون وتعامل معاه بصورة طبيعية ومتنساش تلبس لبس مريح وتاخد معاك لانش بوكس وأكل وشرب كفاية وتعمل حسابك تعمل بيبي في زقاق ورا الورشة لو انت ناوي تقضي اليوم عشان “تقف على ايده وكده”. إنجوي حضرتك وهتوحشنا مقدما.
