مصر من زمان و الحراك الثوري بتاعها نشيط، ممكن يكون خايب شوية – بس نشيط. و من أهم أشكال النشاط الثوري هو الغناء، لأنه بيوصل للناس أسرع. دول 6 من أبرز المغنيين الثوريين على مرور سنين.
١. سيد درويش
ظهرت ثوريته في ثورة 1919، و غنى “قوم يا مصري” و من ساعتها ما بطلش لغاية ما مات في 1923.
٢. الشيخ إمام
أول سجين بسبب الموسيقى في تاريخ الثقافة العربية. اتقبض عليه في كذا مرة عشان نغمة معارضته لحكومة عبد الناصر و سخريته لهزيمة ١٩٦٧. تحالف الشيخ إمام مع الشاعر أحمد فؤاد نجم و دام التحالف ده لسنين. و انتهى مشواره الموسيقي باعتكاف في منزله بعد خلاف ما بينه و بين نجم و عازف الإيقاع محمد علي، و مات بهدوء في ١٩٩٥.
٣. رامي عصام
أسس رامي عصام فرقة موسيقية في 2009 اسمها “مشاكل” و كانت أغاني الفرقة دي معارضة لنظام مبارك. ظهر جامد في التمنطاشر يوم لدرجة ان الناس كانت مسمياه “مغني الثورة”.
٤. كايروكي
اتأسسوا سنة ٢٠٠٣، بس ما تعرفوش أو حتى ما نزلوش أغاني للناس عشان يتعرفوا غير قبل خطاب التنحي بأغنية «صوت الحرية» و اللي الڤيديو كليب بتاعها متصور في ميدان التحرير و بكدا اتبنت لهم قاعدة شعبية كبيرة من خلال الأغنية دي. الفرقة مكونة من ٥ أشخاص: أمير عيد، تامر هاشم، شريف مصطفى، شريف هواري، آدم الألفي.
٥. مسار اجباري
اسمهم بيسخر من الفكر المجتمعي (المسار) اللي بيجبرنا اننا نفكر و نحدد مصيرنا من خلاله. اتأسست فرقة مصار اجباري في ٢٠٠٥ و هي فرقة سكندرية نشأت من مكتبة الإسكندرية. مكونة من: هاني الدقاق، أيمن مسعود، محمود صيام، تامر عطا الله.
٦. علي طالباب
رابر مصري اتشهر بعد الثورة.
مع الخمول الواضح اللي البلد بقت فيه، النوع ده من الأغاني بيكون مفيد جدًا.
