تأثير الاحتباس الحراري وصل لحد هنا و جو مصر تحول الى صيف حار طوال العام و بارد ممطر لمدة اسبوعين شتاءاً. الشتاء في مصر في الفترة الوجيزة ديه مختلف عن اي شتاء في العالم، احنا تقريباً بنكون طالعين من 10 شهور صيف و محتاجين نحسس نفسنا بالبرد و الشتاء و خلاص. دول اكتر 5 مظاهر مش هتشوفهم غير عندنا اكسكلوزيف و بس:
١. بنغرق في شبر ماية
اليوم الي الدنيا بتمطر فيه (و ده بيحصل من مرتين لتلاتة في السنة) مصر بتبقى عبارة عن بحر كبير عميق.. برك مياه في كل حتة.. الطرق بتقف.. محدش بيعرف يتحرك.. يعني عادي ممكن تاخد اكتر من ست ساعات لبيتك عشان كان فيه شوية ماية على الدائري! الي هو احنا عبرنا القناة اسرع من كده!
٢. طين ايفري وير
مفيش شمس و الدنيا بتمطر و الطين بدأ يملى شوارع مصر و انت حظك وحش نزلت بالشوز و الجينز المفضلين عندك.. استعوض ربنا فيهم لان ياما هتدوس في طين و ماية كتير يبوظلك الشوز و الجينز ياما هيعدي من جنبك عربية او موتسيكل ابن تيت بسرعة و يبوظك انت شخصيا
٣. دانسج ان زا راين
الدنيا تبدأ تمطر من هنا، و الناس تتحول من هنا. الي ينزل يجري في الشارع و الي يرقص و يتنطط و واحد تاني فارد ايده و مغمض و عينه و فاتح بقه متفهمش كان محروم انه يشرب و لا ايه.. بس احنا معزورين يعني .. الدنيا مبتمطرش كل يوم! الحالة ديه بتنطبق على المصريين كلهم ما عدا امهات مصر الي بيبقى كل هدفهم ينقذوا الغسيل الي على حبل.
٤. بت فيرست…
الدنيا بتمطر جامد و شعرنا الي لسه عاملينه هيتحرق و هدومنا هتتملي ماية برا و جوا و هنمشي مبللولين و مش بعيد ناخد دور برد ابن لذينية يقعدنا في السرير اسبوعين ..بت فيرست لاتس تاك اسيلفي.. اي مين ديه لحظة متتعوضتش يا جماعة!
٥. ورجعت الشتوية
فيس بوك.. تويتر.. و اي وسيلة تواصل اجتماعي بيظهر فيها بوستات من نوعية “و رجعت الشتوية” و قلوب و فيروز و هوت شوكلت و بنات بتنفخ في ايديها من البرد و اي حاجة تحسسنا ان احنا عندنا شتا بجد.
