شفتها في كتب كتاب زميلك في الشغل؟ اتقابلتوا في عيد ميلاد بنت عمك؟ بتشتغلوا مع بعض في البنك؟ خدت نمرتها وعزمتها على قهوة في كوستا وهي طلبت لاتيه عشان رقيقة وكده؟ مبروك يا جماعة انتما الان في “ريليشن-شيب”.
تعرف معي عزيزي الطالب على تفصيل وتحليل دقيق للعلاقة بين اثنين في مصر…
أولا: مرحلة التظبيط
احلى مرحلة بين اي اثنين وعادة ما تنطوي على الافعال والعبارات الاتية
مفيش حاجة اسمها تركبي تاكسي او تيجي سايقة, انا هعدي اجيبك واروحك
طمنيني عليكي يا حبيبتي
يومك كان حلو؟
جربي ده, بيعملوه هنا كويس اوي (احيانا ممكن تدوقوا بعض بالشوكة)
شكلك حلو اوي النهارده
على فكرة انا بغير
ابعتيلي مسج او كلميني وانتي ماشية ولما توصلي البيت
ارتفاع غير مسبوق في فاتورة التليفون او عدد كروت الشحن
ابتسامة بلهاء دون سبب تستمر طوال اليوم
يوم الشغل بقى طويل وممل وبتحلم بالساعة اللي تروح تقابل الطرف التاني فيها
عدد ساعات النوم بيقل عشان مكالمات الليل واخره بتزيد (غمزة وكده)
مصروف الخروج واللبس بيزيد جدا والكوافير بالنسبة للبنت تحول لاهم شخص في حياتها
بتحبي المانجا؟ وانا كمان…ايه التوافق ده
كل اغاني الحب بقا ليها معني وعبد الحليم حافظ رجع على الساحة
تنهيدة من القلب وانت بتمسك التليفون تكلمها
النصيحة هي, استمتع بكل لحظة بس متحاولش تطول فيها اوي لو حسيت الدنيا بتتغير, التطور من سمات الحياة.
ثانيا: التعديلات والموديفيكشن
انا خايف على صحتك وانتي بتشربي قهوة-سجاير-شيشة-شاي- ليمون بالنعناع كتير
هي صاحبتك دي على طول صوتها عالي كده؟
صاحبك ده شكله بتاع شرب-نسوان-حشيش, صح؟
مامتك على طول بتكلمك كده؟
جالي عريس امبارح (غمزة برضه)
ماما سألتني عليكي امبارح
بابا سألني عليك امبارح
كل ما سبق هي مرحلة اضافة تعديلات طفيفة (او كبيرة) على شخصية اللي قدامك عشان يلائمك ودي حاجة انسانية طبيعية المشكلة فيها بتكون عدم رغبة الاخر في تغيير نفسه. برضه دي مرحلة تمهيدية للصدام والصدام نوعين يا صدام قرار الارتباط الرسمي, يا صدام اكتشافك ان الشخصية دي مش هي اللي ممكن تقضي بقية عمرك معاها.
ثالثا: مين يسيب التاني الاول؟
الحقيقة هي ان فكرة قعدة نسيب بعض دي مش الطف قعدة ولو انت معندكش عشر سنين فانت محتاج تقعد تتكلم معاها زي العاقلين مش تبعت مسج مثلا!
القعدة مش سهلة وكلام الكبار مش هيجي فهتلاقي نفسك بتعمل حركات لا ارادية تبوظ العلاقة (الكلام يسري على الطرفين).
يعني مثلا تبتدوا تفقدوا الاهتمام بالتفاصيل, متاخدوش بالكوا من اي حاجة متغيرة اساسا وتبطلوا تسألوا بعض على حاجة ممكن تكون مملة او فيها حوارات من باب عدم وجود الرغبة في الاهتمام بشيء مش قاعد في حياتك كتير.
الميل للخروج من غير بعض بيزيد والصمت والبحلقة في التليفون تزيد .من الاخر المرحلة دي علاماتها المميزة هي الرغبة الطفولية في هي انها “تيجي من الطرف الثاني” مش منك.
نصيحتي هي: خليك أد المسؤولية واعمل الصح!
ثالثا بشرطة: يا دبلة الخطوبة وكده
انت من الاحرار يا علي…لقيت فتاة احلامك وابتدت فكرة انك تصحى تلاقيها نايمة معمصة ومنكوشة جنبك مبقتش فكرة وحشة. وانتي متقبلة فكرة غسيل شراباته على الحوض عادي. شوية نصائح عامة ومبروك مقدما:
متاخدش جاتوه وانت رايح تخطب عشان دي معناها انك هتستنى تاكل منه وتقعد تفكر فيه طول القعدة
النيش مش مهم
الشبكة هدية منك ليها, والهدية مش المفروض تتحدد قيمتها مسبقا.
دلع حماتك وانتي قولي لحماتك يا ماما, النتيجة سحرية
مش ضروري تعزم مصر كلها على الفرح, اعزم اللي بيحبوك وهيفرحولك بجد حتى لو عشر افراد
الاستعداد للجواز مش معناه انكوا تبعدوا عن بعض رومانسيا, مينفعش كل الكلام يبقى عن الشقة والفرح والفلوس, ده وقتكوا, استمتعوا بيه
النيش مش مهم
وبالمرة, اوضة اطفال ايه اللي تتكلموا فيها وانتوا لسه لابسين دبل؟ متقاطعوش!
الجواز مش الفرح وليلة الدخلة, دي البداية مش خط النهاية اللي لازم توصلوله.
القائمة ووصل الامانة والشيك على بياض والشقة باسمها, الراجل مش وظيفته تمويل الجواز والطلاق, متتجوزيش راجل انتي كاسرة عينه بالفلوس من اولها
واخيرا…العلاقات مش ترفيه, ارتبط باللي يملا عينك بجد واظهر كل عيوبك قبل مميزاتك, الدنيا اقصر من اننا نقضيها تمثيل.
