قالك في الدول المتقدمة اللي احنا منها (ضحكة رقيعة), فيه حاجة خير اللهم اجعله خير اسمها ضرايب, انا وانت بندفعها من دخلنا. هي حاجة ده ببساطة زي مصروف البيت اللي بتديه لمراتك. هي بتستخدمه عشان تأكلك وتشربك وتدلعك وتلبسك وتعالجك وكده.
في مصر الموضوع مختلف شوية, تحس مراتك ناشز وبتاخد منك نفقة متعة ونفقة أطفال والشقة اساسا رغم انكوا مخلفتوش. يعني انت بتدفع كل شهر عشان متاخدش اي حاجة خالص. تعرف على اكثر اوجه عبثية تنفق فيها الحكومة فلوس ضرايبك. والضحك ممنوع والشتايم ممنوعة
١. الفحر
اللي هو مش الحفر, اللي هو لما شارع بيتكوا يتحفر عشان الغاز وبعدين يتحفر عشان المية وبعدين عشان الكهرباء وبعدين عشان التليفونات حطت حاجتها مكان الكهرباء من غير متقول لبتوع الكهرباء, تحس كده ان فيه علاقات فاشلة ومشاكل في التواصل. في الحالة دي ممكن يستغلوا فلوس الضرايب في انهم يجيبوا تليفونات محمولة يكلموا بعض وينسقوا قبل ما يبهدلوا ام الشارع.
٢. متلازمة الكهرباء والزبالة
تنقسم المشكلة لمليون مصيبة, لو انا بدفع فلوس من ضرايبي عشان تنضفوا الشارع من الزبالة, ليه بتنزل فلوس الزبالة على فاتورة الكهرباء وبعدين اصلا انا بحاسب الزبال كل شهر. يعني انا بدفع 3 مرات والشوارع مليانة زبالة.
٣. الدعم
كلنا زي الجدعان دفعنا عشان كارت الدعم بتاع البنزين, والحكومة بتدفع فيه من فلوس ضرايبنا, هو حاليا مأنسني في المحفظة مبعملش بيه حاجة. لا والكارت مميكن كمان, العبي يا حكومة يا الكترونية!
٤. السينما
اللي اعرفه ان الحكومة بتدعم الفن من فلوس ضرايبي, طيب انا بدفع حاجات غريبة من ضمن تمن التذكرة ليه؟ ايه ضريبة الخير دي؟ افرض انا شريرة وعايزة ادخل النار, انتوا بتاخدوا الفلوس مني غصب عني ليه؟
٥. نور الشوارع
في مصر فلوس ضرايبك بتخلي الشوارع بالليل ضلمة وشاعرية والصبح منورة جدا, ليك شوق في حاجة؟
٦. الطرق والكباري
لسه بنخبط بعض في حوادث والمحور بيتصلح على فكرة من ساعة ما انا كنت بضفاير. عادي بأه.
٧. التعليم في مصر
هاهاهاها, اه والله. احنا بندفع تمن التعليم الحكومي من ضرايبنا بس هو سؤال الحلقة بصفتي خريجة التعليم الحكومي, احنا بندفع مصاريف كتير برضه على فكرة وليه بدفع 100 جنيه عشان رسوم شهادة التخرج اللي عمري ماستلمتها عشان الموظفة كل مرة تبقى في اجازة وضع.
٨. مكتب العمل
اللي هو ببلاش الصراحة بس هو لازمته ايه غير انك تروح تكتب اسمك عند واحد يحول مجال تخصصك لحاجة ملهاش علاقة بيك ويديك ورقة حقيرة مكتوبة بخط ايدك تترمي برضه في ملف تعيينك في الشركة. يعني الموظفين دول بيقبضوا من فلوس ضرايبي عشان يعملوا ايه؟ وبالمرة, انا خريجة اداب انجليزي, اتكتب في مكتب العمل اني مدرسة انجليزي ليه؟ انا عمري ما درست ولا اشتغلت في مدرسة اساسا!
٩. الصحة
المفروض ان الحكومة بتعالجنا ببلاش من اي مرض بخدمة خمس نجوم من فلوس ضرايبنا, * ضحكات شريرة متقطعة*
١٠. الحماية
اوقف الضحك! المفروض ان الشرطة بتقبض من فلوس ضرايبي عشان لما الاقي حرامي يجوا يمسكوه مش نكلم النجدة تقولنا لو سمحتوا هاتوا الحرامي انتوا مش بعاد عن القسم *ترو ستوري*
*حاجة اضافية من باب التنفيس: هي دي مش ضرايب اوي بس المأذون بياخد نسبة من مهري ليه؟ انا اللي هتجوز جوزي مش هو, لو هياخد نسبة من مهري يجي يطبخ بدالي مرة في الاسبوع!
خلاصة القول, هتدفع الضرايب وانت ساكت ومش هتاخد بيها حاجة مفيدة وانت ساكت برضه. تعامل مع الحكومة على انها طليقتك اللي قارفاك وانت اللي غلطان انك اتجوزتها اساسا.
