تكملة للحاجات الي بتضايقني في المواصلات، المترو حوار تاني خالص، عالم اخر تحت الارض. انا فاكرة من سنتين قد ايه كنت متحمسة اني اركبه لاول مرة.. هاهاها كنت على نيتي اوي. دول اكتر ١٠ حاجات بتعصبني في المترو:
١. شباك التذاكر
فيه مثلاً 5 منافذ تشتري منهم تذكرة. ليه ما بيبقاش فيه غير موظف او اتنين بالكتير الي موجودين و الناس كلها متكومة عليهم (معندناش حاجة اسمها طوابير طبعاً) ليه مفيش موظف على كل شباك؟ لية ممكن اقف اكتر من 15 دقيقة عشان في الاخر اجيب تذكرة بجنيه؟
٢. الماكنة
الجهاز الي بتدخل فيه التذكرة عشان تعدي للمترو. فيه بتاع 12 واحدة و اتنين بالكتير الي شاغلين! فين المنطق؟! لازم نكوم خلق الله كلهم على جهازين بس! عشر دقائق كمان ضاعت اهي! الوقت الي بيضيع على فاضي ده في رقبتك انتي يا حكومة. ماشي؟
٣. السلم
لو انت واحد صحتك مساعدك ليه تستخدم السلم الكهربائي؟ على الاقل لو الدنيا زحمة مش لازم تنزنق نفسك وسط الناس التعبانة الي مش قادرة تنزل او تتطلع السلم، لا و لو الدنيا مش زحمة تقف على السلم تسده. كفاية كسل بقى و اهو على الاقل تخسوا شوية
٤. ماشية الزومبي
الناس بتمشي براحة خالص لدرجة انها مبتشلش رجلها من الارض بل بتزحف. الصوت بيبقى مزعج و سخيف و بتمشوا براحة اوي و بتعطلنا و انا بتعصب!
٥. الدخول لعربة المترو
الملحمة. النسخة الشعبية من فيلم 300 . الكل مجهز نفسه ان يزق و يضرب الي قدامه في سبيل انه يركب. حقيقي في اوقات الذروة ان بركب المترو بقوة الدفع. حرفياً ببقى طايرة من على الارض
٦. ممنوع الصعود/ النزول
فيه ابواب مخصصة للصعود و اخرى للنزول. بس تقول لمين يابا! احنا شعب واحد و لازم نتصادم و نتلاحم كلنا في بعضنا
٧. يا نهار تحرش
مش هتكلم عن تحرش الذكر بالانثى، هتكلم عن تحرش من نوع اخر. تحرش الانثى بالانثي في (اسغفر الله العظيم) عربية السيدات. مش معني خالص ان احنا من نفس الجنس اننا نتفعص في بعض كده او تريحي و تسندي عليا بالمنظر ده! الموضوع مقرف.. اوي.
٨. برجاء غلق الابواب
العربة متكدسة بالركاب و لسه فيه ناس عايزة تركب! و هتركب يعني هتركب ملهمش فيه! و يفضلوا ماسكين في الباب و يعطلونا و يأتي صوت واحد بيتخانق مع دبان وشه من فوق يطالب بغلق الابواب عشان نتحرك. خليكوا كده جايبنلنا الكلام من الي يسوى و الي ما يسواش
٩. الفرملة
ليه ممكن تهدي السرعة لحد ما تقف لما ممكن تفرمل فجأة و انت ماشي باقصى سرعة و توقع كل الركاب على بعض؟!
١٠. الاسانسير
في محطات زي (جامعة القاهرة) بيبقى فيه اسانسير مخصص لذوي الاحتياجات الخاصة. نقوم نعمل ايه؟! كله يتجمع عليه عشان ميطلعش كام سلمة على رجله و الي فعلاً محتاجه ميعرفش يركب. اتقوا الله.
