الكوافير اللي هو الحلاق لا مؤاخذة هو صديقك الصدوق, المكان اللي بتدخليله شبه حمدي الوزير تطلعي من هناك سيرين عبد النور. يعني نسمع سلام جامد اوي للكوافير صانع المعجزات والراعي الرسمي للجوازات الناجحة.
لكن الحقيقة انك بعد فترة بتكوني قاعدة معلومات عن كيفية التعامل مع الكوافير, ايه الاخطاء اللي تتجنبيها, ايه الكلام اللي تسمعيه وتسكتي وايه الكلام اللي تسمعيه وتردي.
لك, عزيزتي المزة, اهم خمس جمل تسمعيها في الكوافير وكيفية التصرف حيالها.
١. مين اللي قصلك شعرك؟
البنت الواعية, بتدرك بعد فترة ان مش كل الكوافيرات زي ما بيقولوا “ايديها خضرا” او بتعرف تقص شعر, فعادة بيكون فيه كوافير تقصي شعرك عنده وكوافير تعملي شعرك عنده واحيانا كوافير تالت تصبغي شعرك عنده. مش عيب ولا حرام. لكن الكوافير اللي مبيقصش شعرك كرامته بتوجعه لما يدرك انك قصيتي شعرك بره فلازم يطفحك ويحسسك ان التاني حمار. ما هو هياكل عيش منين؟ ثانيا: انتي كده ضمنيا بتقوليله انت مبتعرفش تقص شعر. نصيحتي هي: فلان برتاح معاه وفاهم دماغي واقطمي الكلام على كده.
٢. شعرك محتاج حمام زيت/حمام كريم/قصة/لون/هايلايت/ حقن جرجير
اي بلا ازرق هو عايز يبيعه, متسيبهوش يفتي, كوني ادرى بطبيعة شعرك وشخصيتك وشغلك وشعرك وشكلك محتاج ايه. اللي يقولك الكوافير ادرى منك وفاهم واسمعي كلامه غزيه على طول. لأن ببساطة في 99% من الحالات النتيجة مش هتعجبك لأنك اساسا مش مقتنعة بيها. افتكري انه مينفعش تحسي بالاحراج, ساعتها تقمصي دور سواق العربية مع الواد اللزج اللي بيبيع مناديل في الاشارة وقوليله لا شكرا.
٣. فتاة الحواجب والظوافر: ” ايه يا “فلانة”, مش هتعدي عليا؟”
برضه, انتي ادرى بنفسك ولو حاسة بالحاجة للذهاب ليها هتطلبيها. متكسفيهاش لأنك هتحتاجيها في الزيارة الجاية, قوليلها لا والله مستعجلة المرة دي وخلاص. نصيحة جانبية من اخت “بلاش حواجب الكفار وبلاش المانيكير الفوسفوري, انتي مش قمع مرور على الطريق الصحراوي ومش المفروض تنوري في الضلمة.”
٤. مش فلانة اتطلقت/ جوزها اتجوز عليها/ صاحبها سابها/ شعرها ولع/ محاسبتش المرة اللي فاتت
سواء تعرفي فلانة او متعرفيهاش, الموضوع ميخصكيش فمتدخليش فيه. من واقع خبرتي, لو شاركتي النهاردة, الحفلة هتتعمل عليكي بكره, ابتسمي واسكتي او ابتسمي واسألي الشخص اللي بيشتغل على حاجة ليها علاقة بالشغل اللي بيتعمل, غيري الموضوع من الاخر.
٥. ابني عيان/جوزي ضربني/موظفين المحل بيسرقوني
دي وسيلة طبيعية لزيادة التيبس او المشاركة الوجدانية ليس الا, خلي تعليقاتك محايدة ومتعرضيش المساعدة حتى لو في ايدك عشان مش هتخلصي مساعدات.
٦. جملة مريبة تستحق الاشارة: لا مش انا طبعا, اكيد بطلتي تعملي اللي قلت لك عليه!
دي هتحصل لما تشتكي من حاجة حصلتك بسبب الكوافير, مثلا شعرك ابتدى يقع, ضوافرك بتتكسر, اللون ضرب بتنجاني, المهم انه اكيد محدش هيعترف بغلطه وهيطلعك انتي اللي مهملة, ممكن يكون الموضوع ضرب بسبب غلطته او غلطتك, لو مش حاسة براحة او ثقة, غيري الكوافير, اسألي صاحباتك وقرايبك وجربي حد تاني.
نصيحة اخيرة: حتى لو بتحبي الكوافير ده, خلي عندك كوافير احتياطي تاني بترتاحيله برضه إلا اذا كنتي متجوزاه محدش يقدر يجبرك على حاجة انتي مش عاملاه ولو متجوزاه اتطلقي لو بيعمل شعرك وحش, احنا هنهزر في الشعر؟!!
واخيرا لو بيعرض عليكي الصورة دي كدليل على شطارته, خدي بعضك واجري ومتعديش من الشارع بتاعه اساسا!
