٦ خروجات ملهاش وجود في الاقاليم

لو متعود تشرب نسكافيه كل يوم الصبح، و في يوم صحيت مالقتوش، يومك هيبوظ، هتتعصب و تتعفرت و تضايق! عارف ليه؟ عشان انت كنت واثق ان ده مش ممكن يحصلك في يوم من الايام.. اخدته فور جرانتد زي ما بقولوا..
زي حاجات كتيرة اوي سكان العاصمة بياخدوها فور جرانتد مش موجودة في معظم المحافظات التانية، دول اكتر ٦ اماكن محتاج تقدرهم اكتر:

١. مولات

مفيش و لا مول, يعني مفيش براندز يعني مفيش شوبينج!! مفيش شوبينج!!! بس الحمد الله ربنا كرمنا و عندنا فرع كارينا

٢. اماكن ترفيهية

مفيش سينما واحدة بينزل فيها افلام اجنبي.. مفيش.. متخيل حجم المأساة؟

في فالقاهرة بولينج، سكيتنج، دريم بارك و 5000 مكان و في الاخر تشتكي انك مش عارف تخرج فين! احنا عندنا كافيهات كتير! بين كل كافيه و كافيه كافيه! طب نعمل ايه؟

٣. نوادي

عندنا نادي على فكرة! يمكن صغير شوية و تدخل من باب النشاط الرياضي تمشي خطوتين تلاقي نفسك خارج من باب النشاط الاجتماعي .. بس عندنا! اه و فيه حمام سباحة اوليمبي و عندنا استاد

٤. ماكدونالز

تقريباً مفيش منطقة في القاهرة في مفيهاش ماكدونالز، و مع احتفال ماك بمرور 20 سنة على افتتاح اول فرع ليه في مصر، حابة اعرفكوا ان فيه مدن كتير اوي في مصر مفهاش ماك.. خالص!

٥. سينابون

مفيش سينابون!! يعني وقت ما يجيلي كيف اكل سينابون ملاقيش و افضل الف حوالين نفسي زي المدمنين! فيه ناس اصلاً متعرفش ايه سينابون ده.. متخيل حجم السعادة الي فايتاهم؟

٦. الساقية

ساقية الصاوي تقريباً فيها حفلات كل يومين.. احنا عندنا حفلات برده بتبقى مرة كل سنة و لا حاجة و تلاقي المدينة كلها هناك!