لو انت طالب جامعي، فاكيد اول ما قريت العنوان جيه في دماغك كام شخصية معينة كده. التيرم كله كوم، و ايام الامتحانات كوم تاني خالص. خلينا نركز على شخصيات الطلبة على سويشال ميديا ايام الامتحانات:
١. طلاب الصف الاول
الي بيجوا قبل المحاضرة بنص ساعة عشان يقعودوا في اول صف (على اساس لو جم متأخر هيلاقوا حد اقعد مكانهم)، مبيبطلوش اسئلة في احيان كتير غير مفيدة، الي بيفكروا الدكاترة بالمشاريع و الاسينمنتس. الناس ديه بتختفى تماماً ايام الامتحانات من السويشال ميديا. و مهما تعملهم منشن على جروب الدفعة عشان يساعدوك او يشاركوا اي حاجة من الي كتبوها ورا الدكتور بيعملوا فيها من بنها، او مش فاديين طبعاً عشان بيذاكروا و بيرجعوا المنهج على الاقل 15 مرة!
٢. السهن
بتاعه بيتراوح بين 4 و 3.7GPA مكانه عادة ما بين اول 3 صفوف، ال
الشخص ده بيجي وقت الفاينال و الفيس بوك بتاعه بيقلب ملطمة و ولولة انه مش فاهم حاجة و مش عارف هيخلص المنهج ازاي و مش حاسس بمود المذاكرة و حقد على الناس الي بتذاكر! تقريباً بيعمل كده خوف من الحسد. انا و انت و الدفعة كلها عارفة الناس ديه بعينها.. علاجهم: التجاهل التام.
٣. عيد السؤال تاني
الناس ديه ماشية بمبدأ التكرار يعلم الشطار، عندهم كسل رهيب انهم يفتحوا الكتاب او يدوروا شوية في جروب الدفعة، مع انهم لو دوروا هيلاقوا اجابات كل الاسئلة الي عايزين و الي مش عايزين يعرفوها. يعني مثلاً يسأل على ايه الي داخل في الامتحان بعد ما يكون 20 واحد سأل قبله، تاني يوم يسأل عن ايه الي ملغي من المنهج، بعدها بحبة “معلش ممكن حد يقولي ايه الي داخل في الامتحان عشان نسيت”!! التفسير الوحيد للي بيحصل ده انه فراغ و حاسيين بتأنيب الضمير انهم ما بيذاكروش و عايزين يحسوا انهم بيعملوا حاجة مفيدة و خلاص.
٤. نجوم ليلة الامتحان
الناس ديه بتظهر فجأة ليلة الامتحان على جروب الدفعة، و تسأل في الفتافيت الي بين السطور الي انت اكيد اكيد ماخدتش بالك منها او ماقرأتهاش اصلاً. ممكن تبدأ تتوتر و تتعصب و تسأل نفسك سؤال من الاتنين: “هو الكلام ده عندنا في المنهج؟” او/و “يعني هما فاهمين كل حاجة جم على الحتة ديه و مش فاهمينها؟” السؤالين عامة ملهمش اجابة، بس انت اهم حاجة ما تفقدتش ثقتك بنفسك و ما تركزش معاهم عشان صحتك ما تتعبش.
٥. الناس الي بتشتم في كل الناس
مش عاجبهم حد! شاغلين شتيمة و تريقة على دفعة بتاعتهم و جروب الدفعة و الدكاترة و المعيدين و المواد و الجامعة و كل حاجة. و مخنقوين جداً من كمية النوتيفكيشن الي بتجيلهم بسبب جروب الدفعة و بيشكروا مارك على اوبشن الان فولو و قد حياتهم كانت هتخرب من غيره! اهدوا شوية.. ها اهدوا!
٦. ولاد الحلال
لو معاك من دول اتنين تلاتة في الدفعة، تحد ربنا و تبوس ايدك وش و ضهر. ولاد الحلال دول الي بيذاكروا كويس و تقديرهم على طول امتياز، لما بيعملوا ملخصات بينزلوها، لو محتاج حاجة بيفهموهالك، لو حد عنده سؤال بيجابوا عليه. الناس ديه كويسة اوي و مابتستخصرش حاجة في حد. فيه كتير نجحوا بسبب المخلصات الي بينزلوها على جروب الدفعة. و دول ثوابهم عند ربنا كبير اوي.
