حبيبتي, بحب فيك استقلالك بذاتك بس…
حبيبتي, بحب فيكي انك بتسمعي الكلام بس…
فكرة “بس” هي اللي عاملة المشكلة!
المشكلة , عزيزي الرجل, فيك ولا مؤاخذة.
انت عايز ايه؟ لا حقيقي, تعال نولع سيجارة كده ونقعد نتكلم ونشوف المشكلة فين؟
أولاً. أمينة رزق
التعريف العلمي للأم المصرية, الهاتف دعاها لسيدنا الحسين ونزلت تلبي ولبست في الحيط مع سي السيد وكلنا لبسنا معاها. بتسمع الكلام ومبتخرجش من البيت وبتطبخ طبيخ مش بايت وبتربي العيال وحاجة اخر حلاوة. بس عمرك خدت بالك ان ست امينة رزق مبتعرفش تقرا وتكتب, متقدرش تربي عيالها صح, معندهاش فيسبوك وتويتر وانستجرام وجوجل ومتعرفش الدنيا فيها ايه. طموحها انها تخلص شغل البيت قبل ما سي السيد تروح وبتحط راسها على المخدة تتخمد في لحظة من غير قلق.
مميزاتها: على قد أيدك!
عيوبها: لو انت اترفدت من الشغل هي مش هتعرف تشحت معاك عشان بتتكسف.
الاوبشن التاني. أنجلينا جولي
التعريف العلمي للمزة, حيرت اغلب العلماء لانها بتعمل مشاهد الاكشن بنفسها, في فيلم “مستر أند مسز سميث” اثبتت انها ممكن تتأمر ضد جوزها وتقتل جواسيس وتوقع حكومات وبعدين تروح البيت تعمل رز وبسلة وعمود لحمة زي الفل وتفضل مزة وجذابة ورجليها حلوة وبراد بيت يقع في غرامها ويجيب منها ست عيال ويصرف عليهم. برضه بتتخمد في دقيقة من الارهاق بتاع الشغل بس بتنام بعين مفتحة عشان مش واثقة في جوزها.
مميزاتها: الحياة معاها كلها أكشن ولو انت في يوم احتجتها هتلاقيها معاك بمليون راجل
عيوبها: طول الوقت بره البيت ومش ضروري تعمل البسلة طازة. وشغل السيكس بتاعها مكلف كوافيرات وسبا وحمام مغربي وهدوم ومكياج ومدرب شخصي وليلة ده غير مصاريف الست عيال ومدارسهم والدوشة.
الفكرة بمنتهى البساطة ان انا لا امينة رزق ولا انجلينا جولي , انا حاجة في النص كده, ماسكة العصاية من النص, بحب حنية سي السيد على أمينة وارتباط كل تفاصيل حياته بيها بس مقدرش أقعد في البيت مشتغلش وانتج وبحب عشق براد بيت لأنجلينا جولي واهتمامه ببيته ومساعدته ليها في كل تفصيلة في حياتهم بس مش عايزة افضل طول حياتي باجري ورا شغل او احس ان انا اللي عاملة البيت ومش عايزة جوزي يعيش سفلقة عليا. اقدر اعملك بيت زي الفل بس عايزة ايدك معايا برضه. عايزة ابقى فخر انتاج الصناعة المصرية مع تتش من العالمية اللطيفة.
سؤالي هنا, لو انا مش امينة ومش انجلينا, انا مين يا دادة؟ انت عايز مين؟ اختار وانا معاك, ما هو انت سيد الرجالة برضك.
ملحوظة: خد انجلينا وانت مغمض والاسباب واضحة…
