٩ أفلام هادفة تاهت وسط دَوشة الإسفاف

كان صعب إني أصتاد مجموعة من الأفلام اللي ليها معنى و محتوى فكري نضج في وسط الأفلام الهابطة اللي بقينا محاصرين بيها و باين لها كدا بقت واقع مرير هانفضل عايشين فيه… المهم، الحمد لله لاقيت ٩ أفلام هادفة بس مع الأسف تاهت و اتنست ما بين ملايين الأفلام المُسفّة.

١. أسماء

فيلم بيتكلم عن المشاكل اللي بتواجه مرضى الإيدز و نظرة المجتمع ليهم. نزل في السينما في شتاء ٢٠١١، بطولة هند صبري و ماجد الكدواني، إخراج عمرو سلامة و إيهاب عمرو و من تأليف عمرو سلامة.

الإيرادات: ٨٩٣،٧١٠ جنيه مصري

٢. بنتين من مصر

فيلم بيحكي عن مشكلة تأخر الزواج في مصر من خلال بنتين من مصر في التلاتينات. نزل في السينما في صيف ٢٠١٠، بطولة زينة و صبا مبارك، و من تأليف و إخراج محمد أمين.

الإيرادات: ١،٩٨٢،٠٠٠ جنيه مصري

٣. ساعة و نص

بطولة جماعية، كوكتيل من كبار الفنانين و الوجوه الجدد. بيحكي الفيلم عن حادثة قطر العياط اللي راح فيها ٣٦١ بني آدم في ٢٠٠٢، و من خلال الحادثة دي بيحكي لك عن ركاب القطر ده و حكايتهم و مشاكلهم و طبعًا بيعرض المشاكل الإجتماعية و الفساد المتغلغل في البلد. «ساعة و نص» نزل السينما في شتاء ٢٠١٢، و هو من إخراج وائل إحسان و من تأليف أحمد عبد الله.

الإيرادات: ٨،٨٩٩،٧٠٠ جنيه مصري

٤. ميكروفون

فيلم بيحكي عن الفنون الـUnderground، من خلال البطل «خالد» بيرجع مصر على أمل إنه يرجع لحبيبته القديمة و يصلّح علاقته مع والده.. بتتأزم الأمور و في وسط إضتراب خالد بيكتشف موسيقيين شباب مستقلين و فنانين جرافيتي و بيلاقي نفسه في عالم غريب إجتماعيًا. الفيلم نزل السينما في صيف ٢٠١٠، و بطولته خالد أبو النجا و يسرا اللوزي و من إخراج و تأليف أحمد عبد الله السيد.

الإيرادات: ٧٠٠،٠٠٠ جنيه مصري

٥. ٦٧٨

فيلم بيناقش قضية التحرش الجنسي من خلال ٣ شخصيات: صبا (نيللي كريم) و فايزة (بشرى) و نيللي (ناهد السباعي). الفيلم نزل السينما في شتاء ٢٠١٠ و هو من تأليف و إخراج محمد دياب.

الإيرادات: ٤،٥٦١،١٦٤ جنيه مصري

٦. بالألوان الطبيعية

فيلم بيناقش مشكلة مشتركة بين جزء كبير من مجتمعنا من خلال شخصية «يوسف»، و هو الصراع الفكري اللي بيدور في مُخ أي حد في مصر متربي بطريقة تقليدية متعسفة، و اللي هو الصدام ما بين موهبة الرسم و الأفكار الدينية المتشددة اللي عند الناس اللي حواليه – و اللي منهم والدته. الفيلم نزل في السينما في شتاء ٢٠٠٩ و من بطولته كريم قاسم و يسرا اللوزي. من تأليف هاني فوزي و من إخراج أسامة فوزي.

الإيرادات: ١،٣١٠،٠٠٠ جنيه مصري

٧. هليوبوليس

فيلم خفيف بيتكلم عن الحياة الروتينية من خلال حي هليوبوليس القاهري، من ٥ زوايا: إبراهيم (خالد أبو النجا) و هاني (هاني عادل) و يسرا (يسرا اللوزي) و إنجي (حنان مطاوع) و ڤيرا (عايدة عبد العزيز). نزل السينما في صيف ٢٠٠٩، و من إخراج و تأليف أحمد عبد الله السيد.

الإيرادات: ٤،٠٠٠،٠٠٠٠ جنيه مصري

٨. بعد الموقعة

فيلم بيناقش ثورة ٢٥ يناير بس من زاوية مختلفة تمامًا عن كل الكتب و الأفلام اللي اتعملت عن الثورة، من زاوية الخيالة اللي اشتركوا في موقعة الجمل و بيعرض وجهة نظرهم و موقفهم الإقتصادي الميِّت من بعد الثورة. الفيلم نزل السينما في صيف ٢٠١٢، من بطولة منة شلبي و باسم سمرة و ناهد السباعي. و من إخراج يسري نصر الله و من تأليف يسري نصر الله و عمر شاما.

الإيرادات: ٩٦٩،٣٧٠ جنيه مصري

٩. فرش و غطا

زي «بعد الموقعة»، فرش و غطا واخد برضه زاوية مختلفة من قصة الثورة. بس المرة دي من زاوية المسجونين اللي اتهرَّبوا من السجون أيام الـ١٨ يوم. الفيلم نزل في السينما في صيف ٢٠١٣، قام ببطولته آسر ياسين، و من تأليف و إخراج أحمد عبد الله السيد.

الإيرادات: ١٦٨،٥٥٠ جنيه مصري

مع العلم إن في ٢٠١١، «أمن دولت» حقق حوالي ٦ مليون جنيه و «سامي أوكسيد الكاربون» حقق ١٠ مليون، و «شارع الهرم» حقق ١٤ مليون.