اول لما بدأنا مفيش محددناش أي نوع مقالات عايزين نكتبها او قواعد معينة ليها، و اعتمدنا على ان الهدف الأساسي من الموقع هو اللي هيحدد نوعية المقالات. و الهدف هو بدء محتوى عربي قريب من المواطن، مش رخيص و ذو طابع ساخر.
كون إنك اخدت وقت للكتابة لمفيش حاجة نحب نشكرك عليها و ده بيدينا دافع نكمل أكتر. الأتي بعض الحاجات اللي ممكن تساعدك.
١. نميل إلى السخرية
عايز تنتقد ظواهر في المجتمع او عادات بنعملها حاول تدخَل دايماً عامل السخرية في الموضوع.
٢. تجنب الرخص
مقالات عن فوايد الفاكهة، فستان هيفاء الأسود الشفاف، و عشر حاجات تعملها لإسعاد مراتك في غرفة النوم مكانها مش هنا. اكتب لفتكات او مكتوب.
٣. الرخص المبالغ فيه مسموح و بنشجعه
أهم حاجة في نوعية المقالات ديه انك تكون قاصد الرخص. ممكن نشرح ده بمفلمين على سبيل المثال، عمر و سلمى و اللمبي. عمر و سلمى مش عارف إنه رخيص و بيحاول، اما اللميي هو عارف إنه رخيص و بياخد ده لمراحل تانية. فلو عايز تكتب عن مسيرة نادية الجندي، إالهام شاين أو أحمد موسى هنا المكان للكلام ده.
٤. خليك/ي قريب للناس
متكتيش عن احسن عشر نايت كلابز في مصر و احسن حفلات الساحل الصيف ده. احنا شعب مش لاقي ياكل، اكتب للراجل اللي بيجيي كل يوم شغله بتلات مواصلات و مصيفش بقاله عشر سنين. بس كيب إت كلاسي برده.
٥. التوازن
الموقع ساخر اه بس ده مش المقصود بيه نكت و سف، المقالات ممكن تبقى ساخرة او بتقدم حاجة مفيدة أو موضوع سفر جديد.
٦. الكلام في الدين/السياسة/الجنس مسموح بيه
انتقد الحكومة، اكتب عن عنصرية الشعب المصري الدينية أو مشاكله الجنسية. بس بما أن الثورة فشلت زي ماحنا عارفين (يا خيبتنا التقيلة) لو لقينا حد مكلمنا من أمن دولة بيقولولتا شيلو مقال هنشيلو عادي جداً.
٧. الحرفية
ننشر المقالات حسب مقياس جودة متفق عليه و على الكاتب مراعاة هذه المقاييس. ساهم بمقال 500 كلمة على الأقل، و حاول تخليه في صيغة ليست. ضيف عنوان و بداية و نهاية للمقال. حاول تحت صور و فيديوز قدر الإمكان.
٨. الأصالة
محتوى مفيش غير منقول، غير مترجم من لغات اخرى أو سبق نشره في أي موقع اخر. ساعدنا نخليه كده.
٩. مش مصر بس
الموقع ابتدا من مصر بس المحتوى بيكلم كل الي بيكلم عربي.
